Ermənistan Rusiyaya yardım edir – Moskva Qərbin sanksiyalarından yayına bilir
Bir qrup Azərbaycan QHT-si ABŞ və Avropa İttifaqında Rusiyaya qarşı sanksiyaların tətbiqi və icrasına nəzarət edən qurumların rəhbərlərinə Açıq Məktub ünvanlayıb. Məktubda Ermənistanın Rusiya ilə ticarət dövriyyəsinin kəskin artması və bunun sanksiyalardan yan keçməyə şərait yaratdığı vurğulanıb. QHT-lər ABŞ və Aİ-ni Ermənistana qarşı daha sərt nəzarət mexanizmləri tətbiq etməyə, sanksiyaların gücləndirilməsinə və diplomatik təzyiqin artırılmasına çağırıblar. Müraciət Azərbaycanın aparıcı qeyri-hökumət təşkilatlarının rəhbərləri tərəfindən imzalanıb.
Bəs Ermənistanın Rusiyaya sanksiyalardan yan keçməkdə kömək etdiyini göstərən konkret faktlar varmı? Bu müraciətin ABŞ hökuməti tərəfindən necə qəbul ediləcək və hansı tədbirlərin görüləcək?
Mövzu ilə bağlı Açıq Məktubu imzalayanlardan - İqtisadi Resursların Öyrənilməsi Mərkəzinin sədri Ruslan Atakişiyev Crossmedia.az-a açıqlama verib: “Ermənistanın Rusiyaya tətbiq olunan sanksiyalardan yan keçməsinə kömək etməsilə bağlı bir neçə fakt var. Bu faktlar ondan ibarətdir ki, Ermənistan Dövlət Statistika Komitəsinin məlumatına əsasən 2024-cü ilin yanvar ayında Ermənistanın ixracı 2,95% milyard dollar səviyyəsinə çatmışdır. 2010-2020-ci illər ərzində Ermənistanın Rusiyadan ixracı iqtisadi artım sürəti orta hesabla 18% olduğu halda 2020-2023-cü illərdə bu göstərici 64% ə çatıb. Yəni son dövrdə Ermənistanda iqtisadi artım 3 qat olub. Bu da onu göstərir ki, Ermənistanın ixrac potensialı olmadığı halda bu vəziyyəti öz xeyrinə istifadə edərək pul qazanır. 2022-2023 illər ərzində Ermənistanın Rusiyadan ixracın mühüm hissəsinə baxanda görürük ki, smartfonlar, telefon aparatları, televizorlar, monitorlar, proyektorlar ümümilikdə götürsək texnoloji avadanlıqların satışıdır. Halbuki Ermənistanda bunlar istehsal olunmur. Biz hesab edirik ki, bunların açılması ABŞ-da məsələnin daha yaxşı nəzərə alınmasına gətirib çıxardacaq”.
Ayhan Ağarzayev
18:53 06.02.2025
Oxunuş sayı: 11762
