“USAID-in Azərbaycanda fəaliyyəti məqsədəuyğun deyil”
Məşhur sahibkar və Tesla-nın rəhbəri İlon Mask ABŞ Beynəlxalq İnkişaf Agentliyini (USAID) sərt şəkildə tənqid edərək onu "cinayətkar təşkilat" adlandırıb. O, iddia edib ki, USAID EcoHealth Alliance adlı təşkilata 53 milyon dollar köçürüb və bu vəsaitlər sonradan Vuhan laboratoriyasında koronaviruslarla bağlı tədqiqatları maliyyələşdirmək üçün istifadə olunub. Bu iddialar COVID-19 pandemiyasının mənşəyi ilə bağlı yeni müzakirələrə səbəb olub. Qeyd edək ki, bundan əvvəl, 2023-cü ilin dekabrında Azərbaycan Prezidenti İlham Əliyev də USAID-in fəaliyyətini tənqid etmişdi.
Mövzu ilə bağlı politoloq Zeynal Əmrəliyev Crossmedia.az-a açıqlamasında USAID-in fəaliyyətinin uzun müddətdir ABŞ-də və digər ölkələrdə tənqidlərə məruz qaldığını vurğulayıb.
Əmrəliyev bildirib ki, ABŞ-də uzun müddət USAID-in fəaliyyəti ciddi tənqid edilib. Müxtəlif təşkilatlar, ictimaiyyət nümayəndələri və siyasətçilər bu qurumu sərt şəkildə tənqid ediblər. Xüsusilə, Donald Trump hakimiyyətə gəldikdən sonra onun administrasiyasında yer alan şəxslər, o cümlədən Tesla-nın rəhbəri, USAID-in fəaliyyətinə qarşı çıxıblar.
Politoloq vurğulayıb ki, ABŞ daxilində USAID-ə rəhbərlik etmiş bəzi şəxslərə qarşı müxtəlif istintaq tədbirləri həyata keçirilib. "Belə olan halda, öz ölkəsində ciddi araşdırmalara və ittihamlara məruz qalan bir qurumun Azərbaycanda fəaliyyət göstərməsi məqsədəuyğun deyil", – deyə o əlavə edib.
Zeynal Əmrəliyev həmçinin qeyd edib ki, USAID xüsusilə 44 günlük müharibədən sonra Ermənistandakı fəaliyyətini genişləndirib və bu ölkəyə müxtəlif adlar altında maliyyə yardımları ayırıb. "Ermənistan mediasında bu yardımların korrupsiya sxemlərində iştirak etdiyi və Paşinyan hökuməti ilə USAID arasında korrupsiyalaşmış əlaqələrin mövcud olduğu barədə məlumatlar yayılıb. Ermənistan müxalifəti də bu məsələ ilə bağlı ciddi ittihamlar irəli sürüb", – deyə politoloq vurğulayıb.
Bundan əlavə, Əmrəliyev bildirib ki, USAID və digər Qərb fondlarının Ermənistana ayırdığı vəsaitlərin bir hissəsinin silahlanmaya yönəldildiyi bildirilir. "Son dövrlərdə Ermənistan silahlanma prosesini sürətləndirib və bu, regionda gərginliyi artırır. Belə olan halda, humanitar fəaliyyət adı altında fəaliyyət göstərən USAID-in əslində regionun sabitliyini pozan addımlar atdığı görünür. Buna görə də, düşünürəm ki, bu təşkilatın Azərbaycanda fəaliyyət göstərməsinə ehtiyac yoxdur", – deyə politoloq fikrini yekunlaşdırıb.
Nihat Tahirov
13:29 05.02.2025
Oxunuş sayı: 3305
