Deputat: “İran-Azərbaycan münasibətlərində yeni səhifə açıla bilər”
Fevralın 3-də Azərbaycanın Prezidentinin köməkçisi Hikmət Hacıyev Tehranda İran rəsmiləri ilə görüşlər keçirib. Danışıqlar zamanı iki ölkə arasındakı münasibətlərin inkişaf perspektivləri və mövcud əməkdaşlıq imkanları müzakirə olunub.
H.Hacıyev bildirib ki, Azərbaycan İranla heç bir məhdudiyyət olmadan və qarşılıqlı fayda əsasında mehriban qonşuluq şəraitində siyasi, iqtisadi və mədəni əlaqələri inkişaf etdirməkdə maraqlıdır. Onun sözlərinə görə, iki ölkə arasındakı münasibətlərin əsas məqamı qarşılıqlı inam yaratmaq və mövcud anlaşılmazlıqları aradan qaldırmaqdır.
İran Prezident Administrasiyasının beynəlxalq məsələlər üzrə müşaviri Mehdi Saneyi də çıxış edərək Azərbaycanın İran üçün təkcə vacib qonşu deyil, həm də tarixi, qohumluq və dostluq bağları olan ölkə olduğunu vurğulayıb. O qeyd edib ki, iki ölkə arasındakı münasibətlərin hazırkı səviyyəsi mövcud potensiala uyğun deyil və əməkdaşlıq diplomatik çərçivədən çıxaraq özəl sektor və xalq diplomatiyasını da əhatə etməlidir.
Saneyi əlavə edib ki, İran qonşuları, o cümlədən Azərbaycanla strateji tərəfdaşlığa can atır və ikitərəfli münasibətlərdə hər hansı gərginliyi yolverilməz hesab edir. Onun sözlərinə görə, iqtisadi əməkdaşlıq daha da genişləndirilməli və iki ölkə arasında ticarət dövriyyəsi artırılmalıdır.
Milli Məclisin deputatı Hikmət Babaoğlu Crossmedia.az-a açıqlamasında bildirib ki, Azərbaycan Prezidentinin köməkçisi Hikmət Hacıyevin İrana səfəri və keçirdiyi mühüm görüşlər İran-Azərbaycan münasibətlərində yeni bir səhifənin açılmasına səbəb ola bilər:
“Əgər görüşdə səsləndirilən fikirlər və yanaşmalar real olaraq həyata keçirilərsə, bu, münasibətlərdə yeni bir dövrə start verə bilər. Əslində Hikmət Hacıyev Azərbaycan Prezidentinin istək və mesajlarını, eləcə də İran-Azərbaycan münasibətlərində yeni bir səhifə açmaq qətiyyətini İrana çatdırmışdı. Həmçinin, məhdudiyyətsiz tərəfdaşlıq imkanlarının yaranması da bu mesajın tərkib hissəsi idi”.
Deputatın sözlərinə görə, iki ölkə arasında dərin əməkdaşlıq hər iki xalqın maraqlarına uyğundur:
“İran əhalisinin əhəmiyyətli bir hissəsi – yarıdan çoxu – azərbaycanlılardan, türklərdən ibarətdir. Bu baxımdan, İran hakimiyyəti Azərbaycanla münasibətləri formalaşdırarkən bu reallığı mütləq nəzərə almalıdır. Azərbaycan xalqı isə etnik mənsubiyyətindən və dinindən asılı olmayaraq, İranda yaşayan bütün vətəndaşlara eyni dərəcədə xoş münasibət göstərir”.
H.Babaoğlu vurğulayıb ki, Azərbaycan və İran ortaq tarixi və siyasi keçmişə malikdir və bu amil münasibətlərin inkişafında mühüm rol oynaya bilər: “Yetər ki, siyasi iradə olsun və xalqın mövqeyi nəzərə alınsın – o zaman düşünürəm ki, dünyada İrana Azərbaycandan daha yaxın ölkə tapmaq mümkün olmaz. sStrateji əməkdaşlıq çərçivəsində İran-Azərbaycan münasibətlərinin enerji sahəsində artıq tərəfdaşlıq səviyyəsinə yüksəlir. Coğrafi, etnoqrafik və demoqrafik faktorlar da nəzərə alındıqda Azərbaycanın daim İranın maraqlarını diqqətdə saxlaması bu əməkdaşlıq üçün əlverişli zəmin yaradır. Yetər ki, İran-Azərbaycan münasibətlərində yeni yanaşma beynəlxalq hüquq və ədalət prinsiplərinə əsaslansın. Bu halda, əlaqələr növbəti mərhələyə keçə bilər”.
Sonda deputat İran Prezidentinin Azərbaycana səfərə dəvət olunmasını da mühüm hadisə kimi qiymətləndirib: “Azərbaycan Prezidenti İran Prezidentini Azərbaycana səfərə dəvət edib. Bu, Azərbaycanın mövqeyini açıq şəkildə nümayiş etdirir. Çünki Azərbaycan Prezidenti daha əvvəl də İran Prezidentini rəsmi məktubla Bakıya dəvət etmişdi. Bu addım Azərbaycanın İranla münasibətləri ən yüksək səviyyəyə qaldırmaq niyyətini göstərir. Ümid edirik ki, İran Prezidenti bu dəvəti qəbul edəcək və iki ölkə arasında olan bəzi məsələlər həllini tapacaq. Azərbaycan Prezidenti mediaya açıqlamasında bildirib ki, hələ Pezeşkianın fəaliyyətini və Azərbaycanla münasibətlərini qiymətləndirməyib. Buna görə də onunla heç bir görüş baş tutmayıb. Ümid edirik ki, belə bir görüş keçiriləcək və Pezeşkian da prezidentliyi dövründə emosional qərarlardan çəkinərək İran-Azərbaycan münasibətlərinin yaxşılaşdırılması istiqamətində addımlar atacaq”.
Maral Şahverdili
17:00 03.02.2025
Oxunuş sayı: 6479
