DTX və DİN hərəkətə keçdi": "Əməliyyatıar davam etdiriləcək"
Qusar rayonunda beynəlxalq terror təşkilatları ilə əlaqəli olan radikal dini-ekstremist qruplaşma üzvlərinin terror-təxribat əməllərinin müəyyən edilməsi və qanunazidd fəaliyyətlərinin qarşısının alınması istiqamətində Dövlət Təhlükəsizliyi Xidməti və Daxili İşlər Nazirliyinin əməkdaşları birgə kompleks tədbirlər keçirib. Dövlətin təhlükəsizliyi və ictimai asayişin qorunması hər bir ölkənin suverenliyinin əsas dayaqlarındandır. Xüsusilə, dini radikalizm və terrorçuluq müasir dövrün ən böyük təhlükələrindəndir. Bu, qlobal və regional sabitliyə də ciddi təhdid yaradır.
Azərbaycan dövləti bu cür təhdidlərə qarşı qətiyyətli mübarizə apararaq, milli təhlükəsizliyi təmin etmək üçün bütün zəruri addımları atır. Xüsusi xidmət orqanları və hüquq-mühafizə orqanları tərəfindən həyata keçirilən son əməliyyatlar bir daha göstərdi ki, radikal dini qruplaşmalar təkcə xaricdən dəstəklənmir, həm də daxildə müəyyən havadarlara malikdir. Lakin dövlətin güclü iradəsi və peşəkar əməliyyat tədbirləri sayəsində bu qanunsuz fəaliyyətlərin qarşısı qətiyyətlə alınır.
Mövzu ilə bağlı Milli Məclisin üzvü Arzu Nağıyev Crossmedia.az saytına açıqlama verib:
“Azərbaycan xüsusi xidmət orqanları, eyni zamanda hüquq-mühafizə orqanları dini radikal qruplara qarşı mübarizəni davam etdirir. Məlum məsələdir ki, dini radikal qruplaşmalar həm daxildə havadarlara malikdir, həm də xaricdən maliyyələşirlər. Bunun qarşısını almaq üçün əməliyyat şəraitinə tam şəkildə nəzarət edən xüsusi xidmət orqanları və hüquq-mühafizə orqanları keçirdikləri son əməliyyat nəticəsində beynəlxalq terror təşkilatları ilə əlaqəsi olan, dini ekstremist və radikal qrupların hazırladıqları və ya hazırlaşdıqları terror-təxribat əməllərini müəyyən edərək qanunazidd fəaliyyətlərinin qarşısını alıblar”.
Deputat bu cür əməliyyatların davam etdiriləcəyini bildirib:
“Dövlət Təhlükəsizliyi Xidməti və Daxili İşlər Nazirliyi həyata keçirildikləri peşəkar əməliyyat nəticəsində terrorçuların bir qismini zərərsizləşdirilib, digərləri isə həbs edilib. Keçirilmiş əməliyyat bir daha sübut etdi ki, vaxtilə “Meşə Qardaşları” adlı terror qruplaşmasının fəaliyyətində iştirak edən bəzi şəxslər özlərinə tərəfdaş toplayaraq yenidən bu cür addımlar atırlar. Düşünürəm ki, bu cür əməliyyatlar davam etdiriləcək. Bu gün dövlət və dövlətçiliyə qarşı atılan hər bir addıma, müxtəlif zamanlarda Suriya və İraqda müəyyən hazırlıqlar keçmiş və Azərbaycana gəlib çıxmış şəxslərə qarşı ciddi tədbirlər görülür və bundan sonra da görüləcək. Bu, Azərbaycan dövlətinin apardığı müstəqil daxili və xarici siyasətin bariz nümunəsidir. Ali Baş Komandanın göstərişinə uyğun olaraq, bütün hüquq-mühafizə orqanları və xüsusi xidmət orqanları bu istiqamətdə mübarizəni daha da genişləndirəcək”.
Ayhan Ağarzayev
16:11 03.02.2025
Oxunuş sayı: 4073
