AMADA Avropa Şurasının iclasında təmsil olunub
Polşanın paytaxtı Varşavada Avropa Şurasının Antidopinq Konvensiyasının Uyğunluq üzrə Məsləhətçi Qrupunun (T-DO COMP) iclası keçirilib. Tədbirdə ölkəmizi Azərbaycan Milli Antidopinq Agentliyinin (AMADA) aparıcı hüquqşünası Nicat Əmiraslanlı təmsil edib.
Crossmedia.az AMADA-nın mətbuat xidmətinə istinadən xəbər verir ki, müxtəlif ölkələrdən mütəxəssislər və nümayəndələrin bir araya gəldiyi iclasda antidopinq sahəsindəki ən son məsələlər və gələcək fəaliyyətə dair vacib qərarların qəbul olunması müzakirə olunub.
Tədbirin ilk günü Avropa Şurasının Antidopinq Konvensiyasına tərəf olan dövlətlər tərəfindən həmin Konvensiyaya uyğunluğun təmin edilib-edilməməsinin yoxlanılması məqsədilə əvvəlki illərdə Gürcüstan, Bosniya və Herseqovina, Moldova və Avstriya kimi üzv dövlətlərdə həyata keçirilmiş qiymətləndirmə səfərlərinə dair tərtib olunmuş hesabatlar və 2025-ci il ərzində həyata keçiriləcək yeni yoxlamalara dair razılıq əldə edilməsi üçün fikir mübadiləsi aparılıb. Cari il ərzində Konvensiyaya qoşulmuş altı ölkəyə - Kanada, Türkiyə, Monako, Mərakeş, Lixtenşteyn, Şimali Makedoniyaya qiymətləndirmə səfərləri təşkil olunacağı təsdiqlənib. Həmçinin arzu edən dövlətlərin öz ekspertlərini növbəti illərdə təşkil olunacaq qiymətləndirmələrə cəlb edə biləcəyi elan edilib. Mövcud plana əsasən, Azərbaycanın Konvensiyaya uyğunluğunun müəyyən edilməsi məqsədilə Avropa Şurası tərəfindən növbəti səfərin 2032-ci ildə həyata keçirilməsi nəzərdə tutulub. Xatırladaq ki, bu məqsədlə Azərbaycana son səfər 2018-ci ildə təşkil edilmişdi.
Tədbirin ikinci günündə Birləşmiş Krallığın milli antidopinq qurumu (UKAD) tərəfindən hazırlanmış və üzv dövlətlərin illik hesabatlarında əks olunmuş məlumatları özündə əks etdirən dinamik panel ekspertlərə təqdim edilib. Panel sayəsində artıq istifadəçilər istənilən üzv dövlətin 2022-2023-cü illər üzrə həyata keçirdikləri antidopinq fəaliyyəti ilə əyani şəkildə tanış ola və istədikləri ölkələri seçməklə nəticələri müqayisə edə bilərlər.
Ümumdünya Antidopinq Agentliyi (WADA) ilə əməkdaşlıq məsələləri, Ümumdünya Antidopinq Məcəlləsinə Uyğunluq üzrə Beynəlxalq Standarta dəyişikliklərlə bağlı təkliflərin müzakirəsi ilə davam edən iclas öz işini milli antidopinq qurumlarının uyğunluq sahəsində üzləşdikləri problemlərin həlli məqsədilə texniki və hüquqi dəstək təklif edilməsi ilə yekunlaşdırıb. İclasın beynəlxalq əməkdaşlığın inkişafına, antidopinq qanunlarına uyğunluğun təmin edilməsinə və təmiz idman mühitinin yaradılmasına böyük töhfə verməklə yanaşı, gələcək fəaliyyət üçün strategiyanın müəyyən edilməsinə yeni imkanlar açacağı gözlənilir.
12:29 03.02.2025
Oxunuş sayı: 5296
