Tarixi imkan: "Azərbaycanla Ermənistan arasında sülh müqaviləsi realdır"
Azərbaycanın xarici işlər naziri Ceyhun Bayramov Ankarada Türkiyə, Azərbaycan və Özbəkistan arasında keçirilən üçtərəfli görüş çərçivəsində Ermənistanla sülh sazişinin tamamlanmasının vacibliyini vurğulayıb. O bildirib ki, Ermənistanın Konstitusiyası və digər hüquqi aktlarında Azərbaycana qarşı hələ də mövcud olan ərazi iddiaları və revanşist yanaşmalar bölgədə sabitliyə ciddi maneə törədir.
Azərbaycan regionda dayanıqlı sülhün və əməkdaşlığın qurulması üçün konstruktiv addımlar atsa da, Ermənistanın qeyri-müəyyən mövqeyi və müxtəlif təxribatçı addımları bu prosesi ləngidir. Xüsusilə, rəsmi İrəvanın siyasi və hüquqi sistemində Azərbaycanın suverenliyinə qarşı iddiaların yer alması, eləcə də xarici qüvvələrin təsiri altında müxtəlif beynəlxalq platformalarda anti-Azərbaycan ritorikasını davam etdirməsi sülh danışıqlarına ziddir. Bundan əlavə, Ermənistanın Avropa İttifaqı və digər Qərb dövlətlərinin siyasi dəstəyinə güvənərək regiondakı geosiyasi balansı öz xeyrinə dəyişməyə çalışması, Cənubi Qafqazda uzunmüddətli sülhün təmin olunmasına mane olur.
Mövzu ilə bağlı siyasi elmlər üzrə fəlsəfə doktoru Eldar Cəfərov Crossmedia.az-a açıqlama verib:
“Ermənistan düşünür ki, öz konstitusiyası ilə bağlı dəyişikliyə getməməlidir. Amma həm Azərbaycan tərəfi, həm də bir neçə qonşu ölkə Ermənistanla olan münasibətlərin nizamlanmasında Konstitusiyasının preambulasının dəyişdirilməsi ilə bağlı müxtəlif təkliflər irəli sürürlər. Çünki həmin deklarasiyanın əsas hissəsində belə bir müddəa var ki, Dağlıq Qarabağ ermənilərinin və yaxud da Ermənistanda yaşayan ermənilərin vahidliyi, birliyi üçün Dağlıq Qarabağ Şurası elan edilib ki, biz Ermənistana birləşirik. Yəni burda Dağlıq Qarabağın Ermənistan birləşdirilməsi ilə bağlı xüsusi ifadələr var. Bu, Ermənistanın xarici siyasətində əsas göstəricilərdəndir".
Analitikin sözlərinə görə, Azərbaycanın öz suverenliyini bərpa etdikdən sonra sülh danışıqlarında əsas prioritet istiqamət kimi Ermənistan konstitusiyasının dəyişdirilməsi ilə bağlı tələbi ədalətlidir və Ermənistanın konstitusiyasını dəyişdirilməsi mütləqdir: "Sülh müqaviləsi imzalanmasının hazırda real göründüyünü bildirib. Konsititusiyaya dəyişikliyin edilməməsi, əlbəttə, sülh prosesinə təsir göstərir. Ermənistan tərəfi elan elədi ki, onlar Azərbaycanın bütün şərtləri ilə razılaşmışıq və bir neçə maddə var idi ki, artıq onlar artıq qəbul edildi. Bu gün sülh müqaviləsinin imzalanması kifayət qədər real görünür. Çünki artıq Almata Bəyannaməsi və əsas müddəaların hər ikisini Ermənistanın qəbul etməsi və digər məsələlərdən sonra yeni reallıqlardan danışmaq mümkündür. Ermənistan müxtəlif bəhanələrlə bu prosesi uzatmaq istəyirsə bu, onun üçün pis nəticələnəcək”.
Ayhan Ağarzayev
16:35 31.01.2025
Oxunuş sayı: 6881
