Bələdiyyə seçkiləri ilə bağlı son vəziyyət: Crossmedia.az-ın əməkdaşı məntəqələrdə oldu
Bu gün səhər saat 8-dən etibarən ölkə üzrə 5 846 seçki məntəqəsində bələdiyyə seçkiləri başlayıb. 118 seçki dairəsində keçirilən seçkilərdə 685 bələdiyyənin 8 071 üzvü üçün 16 092 namizəd mübarizə aparır. Səsvermə 19:00-dək davam edəcək.
Crossmedia.az olaraq 16 saylı Yasamal II Seçki Dairəsinin 19, 20, 21 və 22 saylı seçki məntəqələrində seçki prosesini izlədik.
Əvvəlcə 19 saylı seçki məntəqəsində olduq. İzdihamdan hiss olunurdu ki, seçici fəallığı kifayət qədər yüksəkdir.
Məntəqə sədri Aybəniz Qurbanovanın dedikləri də belə qənaətə gəlməyə əsas verir: “Məntəqədə ümumilikdə 1249 seçici qeydə alınıb. Daşınmaz qutumuz yoxdur və indiyə qədər daşınan qutular üçün heç bir müraciət daxil olmayıb. Saat 12-yə qədər 85-86 nəfər səs verib. Hazırda məntəqədə 10 müşahidəçi prosesi izləyir və seçkilərlə bağlı indiyədək heç bir narazılıq qeydə alınmayıb”.
20 saylı saylı seçki məntəqəsinin müşahidəçisi Toğrul Məmmədov seçki prosesinin tam şəffaf keçdiyini vurğulayıb: "İndiyə qədər hər hansı bir qanun pozuntusu və ya problem qeydə alınmayıb". Seçici aktivliyinə toxunan müşahidəçi bildirib ki, hazırda 1360 seçicidən 170-i səs verib. O, ümumi vəziyyəti belə dəyərləndirib: "Məntəqədə hər şey qaydasında davam edir".
21 saylı seçki məntəqəsinin sədri Valeh Bəyəliyev səsvermənin uğurla davam etdiyini bildirib: "Ümumi seçici sayı 1245 nəfərdir və saat birə qədər 101 nəfər artıq qeydiyyatdan keçərək bülletenini alıb səs verib".
O qeyd edib ki, ciddi problem qeydə alınmayıb, seçicilər məntəqəyə gəlib-getməkdə davam edirlər.
22 saylı seçki məntəqəsinin sədri Arif Məmmədov seçki prosesinin sabit davam etdiyini vurğulayıb: "Saat səkkizdən etibarən seçki məntəqələrində səsvermə başlayıb. Seçki müşahidəçiləri daim prosesi izləyir və hər bir məqam diqqətlə nəzərdən keçirilir".
Onun sözlərinə görə, indiyə qədər heç bir neqativ hadisə baş verməyib və hər hansı qanun pozuntusu aşkarlanmayıb: “Səhər saatlarında seçici aktivliyi daha yüksək olub. Gün ərzində seçici axını dəyişsə də, ümumi tendensiya aktivliyin sabit qaldığını göstərir. Məntəqədə seçki heyəti təcrübəli olduğuna görə səsvermə prosesi heç bir maneə olmadan davam edir”.
16 saylı Yasamal II Seçki Dairəsinə daxil olan seçki məntəqələrində də səsvermə sakit və şəffaf şəkildə keçirilir. Həm seçki məntəqə sədrləri, həm də müşahidəçilər seçki prosesində hər hansı qanun pozuntusunun olmadığını bildirirlər. Seçici fəallığı müxtəlif saatlarda dəyişsə də, ümumi tendensiya stabil və qənaətbəxş səviyyədədir.
Nihat Tahirov
16:29 29.01.2025
Oxunuş sayı: 8028
