Həkim meymunçiçəyi ilə bağlı mümkün vaksinasiyadan danışdı: "Yoluxmalar mümkündür"
Dünyada yayılan meymunçiçəyi xəstəliyi Azərbaycanda da özünü göstərib. Yanvarın 18-də Azərbaycanda ilk dəfə meymunçiçəyi xəstəliyinə yoluxma faktı təsdiqlənib. Xəstəlik 22 yaşlı vətəndaşda aşkarlanıb. O, 2-11 yanvar tarixlərində xarici ölkəyə turistik səfər edib. Vətənə qayıtdıqdan bir neçə gün sonra narahatlıq əlamətləri ilə Bakıda fəaliyyət göstərən klinikalardan birinə müraciət edib. Müraciət zamanı halsızlıq, yüksək hərarət, genital nahiyədə suluqlu səpgilər, limfa düyünlərinin böyüməsi və əzələ ağrıları kimi simptomlar müşahidə olunub.
Meymunçiçəyinə qarşı vaksinasiya prosesinin aparılması ilə bağlı mütəxəssislər bildirir ki, hazırda Azərbaycanda meymunçiçəyinə qarşı kütləvi vaksinasiyaya ehtiyac yoxdur. Belə ki, vaksinlər yalnız endemik risk qrupunda olan ölkələrdə tətbiq olunur.
Azərbaycanda meymunçiçəyi xəstəliyinə yoluxma halına görə vaksinasiya mərhələsinin həyata keçirilib- keçirilməməsi ilə bağlı Crossmedia.az-a tibb üzrə fəlsəfə doktoru Şəmsiyyə Namazlı açıqlama verib.
Onun sözlərinə görə, meymunçiçəyi xəstəliyi ilk dəfə Mərkəzi Afrikada aşkarlanıb və oradan digər ölkələrə yayılıb: “Turistik şəhərlərə səfərlərin artması və sərhədlərin açıq olması səbəbindən bu virus bir bölgədən digərinə, bir ölkədən digərinə keçməyə başlayıb. Meymunçiçəyi COVID-19 kimi pandemiyaya səbəb olmayacaq, lakin yoluxmalar mümkündür. Virusun keçməsi insandan insana təmasla və gəmiricilər nəticəsində baş verə bilər. Meymunçiçəyi xəstəliyi suçiçəyi kimi özünü göstərə bilər. Dəridə səpgilər, halsızlıq kimi əlamətlərlə müşahidə olunur və bu vəziyyət 5 gün ilə 3 həftə, yəni təxminən 2-4 həftə ərzində sağalmağa doğru gedir. Virus təbiətinə görə mutasiyaya meyilli deyil”.
Həkimin fikrincə, bu xəstəliyə qarşı xüsusi peyvənd mövcud deyil, lakin suçiçəyinə qarşı peyvəndlər qismən də olsa təsir göstərə bilər: “Əgər bir şəxs əvvəllər suçiçəyi peyvəndi alıbsa, meymunçiçəyi xəstəliyini daha yüngül formada keçirmə ehtimalı var. Ümumdünya Səhiyyə Təşkilatının statistikasına əsasən, Afrika ölkələrində hər il minlərlə insan bu virusa yoluxur. Buna görə də, yoluxma hallarında təcrid tədbirləri görülməli və digər insanlarla təmas minimuma endirilməlidir”.
Fidan Hacızadə
12:52 23.01.2025
Oxunuş sayı: 6124
