Sağlamlıq
Azərbaycanda veganuary trendi: bitki mənşəli qidalanma
Son illərdə dünyada geniş yayılan Veganuary hərəkatı Azərbaycanda da maraqla qarşılanır. Bu kampaniya insanları yanvar ayını tamamilə bitki mənşəli qidalanma ilə keçirməyə təşviq edir. Ətraf mühitin mühafizəsi, heyvan hüquqlarına dəstək və sağlam qidalanma vərdişlərinin artırılması məqsədilə formalaşan bu trend ölkəmizdə də həm fərdi, həm də ictimai səviyyədə diqqət çəkməyə başlayıb.
Mövzu ilə bağlı Crossmedia.az-a danışan tanınmış həkim diyetoloq, diyet kitablar müəllifi, uzun ömürlülük üzre ekspert Leyla Zülfüqarlı bildirib ki, sağlam həyat tərzi üçün heyvan mənşəli qidaların qəbulu vacibdir:
"Vegan həyat tərzi ölkəmizdə təəssüf ki, trend halını alıb. Sağlam qidalanma mütəxəssisi olaraq burada "təəssüf ki" sözünü işlədirəm. Çünki bir çox heyvan mənşəli məhsulların tərkibindəki vacib maddələr vegan həyat tərzi sürəndə kafi, natamam qalır.
B12 maddəsi, xrom, kobalt çox vacib maddələr yalnız heyvan mənşəli qidaların, ətlərin tərkibində olur. Bəzən əvəzolunmayan amin turşuları, triptofan və s. bunlar da daha çox hinduşka ətində var. Bu maddələrin bəzilərini paxlalar qrupunda tapa bilərik amma o paxlalar belə yetərincə əlçatan deyil. Buna görə də ət məhsullarının tərkibindən alacağımız maddələri yalnız vegan bəslənməsi edərək almaq mümkün deyil. Məhz bu səbəbdən vegan qidalanmanın trend olmasının tərəfdarı deyiləm".
Həkim-diyetoloq qeyd edib ki, vegan məhsulların ölkəmizdə istehsal istiqaməti ilə bağlı da bir sıra problemlər yaşanır.
"Vegan qidalanma zamanı bəzi toxumlarla qidalanmaq lazım gəlir amma o toxumlar ölkəmizdə əlçatan qiymətə deyil. Ümumiyyətlə bu məhsulların özü də alçatan olmur. Marketlərdən tapılması belə çətindir. Təəssüf ki, bu məhsullar yerli bazarda çox zaman mövcud olmur. Məsələn kinoa toxumu əlçatan deyil və bir çox bazar və marketlərdə çox zaman tapılmır. Bu istehsal istiqaməti ilə bağlı yaşanan problemlərdir".
Saida Ramazani
20:07 22.01.2025
Oxunuş sayı: 16343
