"Bağçalı türk dünyasının baş ağsaqqalı olsun!" – Azərbaycandan TDT-yə müraciət hazırlanır
“Hilal” təşkilatının rəhbəri Arzuman Abdulkərimov Türkiyənin Milliyyətçi Hərəkat Partiyasının (MHP) lideri Dövlət Bağçalının Türk Dövlətləri Təşkilatının (TDT) Ağsaqqallar Şurasının sədri seçilməsi təşəbbüsü ilə çıxış edib. O, bu təklifin yaxın günlərdə rəsmi müraciət şəklində TDT rəhbərliyinə təqdim olunacağını açıqlayıb.
Crossmedia.az xəbər verir ki, Arzuman Abdulkərimov bu diqqətçəkən bəyanatı TNS televiziyasının rəhbəri Tural Səfərə müsahibəsində səsləndirib.
“Hilal” təşkilatının rəhbəri bildirib ki, Türkiyə ilə Azərbaycan arasında son dövrdə münasibətləri gərginləşdirməyə yönəlmiş cəhdlər zamanı MHP və onun lideri Dövlət Bağçalı prinsipial mövqeyi ilə fərqlənib. Onun fikrincə, Bağçalının siyasi nüfuzu, türk dünyasında qazandığı hörmət və qardaş dövlətlər arasında həmrəyliyin qorunmasındakı xidmətləri bu təşəbbüsü aktual edir.
Türk dünyasının Dövlət Bağçalı kimi ağsaqqala ehtiyacı var
Abdulkərimov müsahibəsində təşkilatının mövqeyini belə ifadə edib: “Bu gün təşkilatımızın açıq mövqeyini sizin efir vasitəsilə həm Türkiyə, həm Azərbaycan ictimaiyyətinə, həm də Türk Dövlətləri Təşkilatının rəhbərlərinə çatdırmaq istəyirik. Hesab edirəm ki, bundan sonra TDT-nin Ağsaqqallar Şurasına Dövlət Bağçalının rəhbərlik etməsi çox yerinə düşər”.
O, MHP liderinin bütün türk dövlətlərinin rəhbərləri arasında böyük hörmətə malik olduğunu xüsusi vurğulayıb: “Düşünürəm ki, Türk Dövlətləri Təşkilatına üzv olan bütün dövlətlərin rəhbərləri Dövlət bəyə böyük hörmətlə yanaşırlar. Onun hər biri ilə səmimi münasibətləri var. Azərbaycan Prezidenti ilə də münasibətləri olduqca səmimidir. Dövlət Bağçalı hər zaman öz siyasi nüfuzunu və ağırlığını türk dünyasının birliyi naminə ortaya qoyub”
Abdulkərimov MHP rəhbərliyinin son dövrdə türk respublikalarına səfərlərini də xatırladıb. Bildirib ki, partiyanın sədr müavinləri və baş müşavirləri müxtəlif türk dövlətlərində görüşlər keçirərək siyasi əlaqələrin möhkəmləndirilməsi istiqamətində fəaliyyət göstəriblər.
Onun sözlərinə görə, son hadisələr türk dünyasında nüfuzlu və prinsipial ağsaqqal institutunun əhəmiyyətini bir daha nümayiş etdirib: “Allah bizi bir daha belə sınaqlarla üz-üzə qoymasın. Ancaq belə məqamlarda Dövlət Bağçalı kimi siyasi liderlərə ehtiyac olduğu aydın görünür. Türk dünyasının hər zaman sözü keçən, mövqeyi dinlənilən, ağsaqqal nüfuzuna malik şəxsiyyətlərə ehtiyacı var”.
Binali Yıldırıma yüksək qiymət: “Azərbaycanın dostudur, onu çox sevirik”
“Hilal” təşkilatının rəhbəri TDT Ağsaqqallar Şurasının hazırkı sədri, Türkiyənin sabiq baş naziri Binali Yıldırımın xidmətlərini də xüsusi qeyd edib.
Abdulkərimov bildirib ki, Binali Yıldırım türk dünyasının dəyərli siyasi xadimlərindən biridir və Azərbaycana münasibətdə hər zaman dostluq mövqeyi nümayiş etdirib.
“Binali Yıldırım bəy bizim üçün çox əziz insandır, dostumuzdur, Azərbaycanın dostudur. Onu çox sevirik və xidmətlərini yüksək qiymətləndiririk. Bununla yanaşı, hesab edirəm ki, növbəti mərhələdə Dövlət Bağçalının Türk Dövlətləri Təşkilatının Ağsaqqallar Şurasına rəhbərlik etməsi məqsədəuyğun olardı”.
Qeyd edək ki, Binali Yıldırım son dövrdə Azərbaycan–Türkiyə münasibətləri ətrafında yaranmış müzakirələr zamanı Azərbaycanın mövqeyini dəstəkləyən açıq bəyanatları ilə diqqət çəkib.
Gələn həftə TDT-yə rəsmi məktub göndərəcəyik
Arzuman Abdulkərimovun açıqlamasında ən mühüm məqamlardan biri təşəbbüsün yalnız televiziya efirində səsləndirilən fikir olaraq qalmayacağı barədə bəyanatıdır.
O, təklifin təşkilat adından rəsmiləşdiriləcəyini bildirib “İnşallah, gələn həftə bu təşəbbüsü təşkilatımızın rəsmi müraciəti şəklində ictimaiyyətə açıqlayacağıq və müvafiq məktubumuzu Türk Dövlətləri Təşkilatına təqdim edəcəyik”. Beləliklə, “Hilal” təşkilatı Dövlət Bağçalının TDT Ağsaqqallar Şurasının sədri olması məsələsini rəsmi qaydada gündəmə gətirməyə hazırlaşır.
MHP-nin rolunu danmaq olmaz – Bəzi partiyalar isə hələ də susurlar
Abdulkərimov müsahibəsində Türkiyə ilə Azərbaycan arasında son dövrdə yaşanan siyasi gərginlik zamanı türk milliyyətçi qüvvələrinin mövqeyinə də toxunub.
O, MHP-nin və Dövlət Bağçalının fəaliyyətini yüksək qiymətləndirərək bildirib ki, iki qardaş ölkənin münasibətlərinə zərər vurmağa çalışan qüvvələr qarşısında nümayiş etdirilən prinsipial mövqe unudulmamalıdır.
“Haqqı danmaq olmaz. İnsanların haqqını vaxtında vermək lazımdır. Bu məsələdə Milliyyətçi Hərəkat Partiyasının rolu danılmazdır. Əlbəttə, Türkiyədə milli düşüncəyə sahib digər partiyaların rəhbərlərinin də açıqlamalarını gördük. Amma elə siyasi partiyalar da var ki, bu günə qədər səslərini çıxarmayıb, mövqelərini bildirməyiblər”.
Abdulkərimovun fikrincə, Dövlət Bağçalının Azərbaycanın yanında dayanması təsadüfi siyasi davranış deyil, onun uzun illərdir davam etdirdiyi prinsipial xəttin nəticəsidir.
MHP lideri Qarabağın işğal altında olduğu dövrdə də, 44 günlük Vətən müharibəsində də, son siyasi gərginlik zamanı da Azərbaycanla həmrəyliyini qoruyub.
16:04 10.11.2026
Oxunuş sayı: 132
