Sovet kəşfiyyatçısı necə məşhur uşaq yazıçısına çevrildi?
İkinci Dünya müharibəsi illərində kəşfiyyat fəaliyyəti ilə məşğul olmuş bəzi sovet kəşfiyyatçıları təqaüdə çıxdıqdan sonra ədəbiyyata üz tutaraq həm uşaqlar üçün hekayələr, həm də öz həyatlarından bəhs edən xatirə əsərləri yazıblar.
Crossmedia.az xəbər verir ki, Rusiyanın TASS agentliyi bu barədə material yayıb.
Belə şəxslərdən biri də keçmiş sovet kəşfiyyatçısı Zoya Voskresenskaya olub. O, 1955-ci ildə təqaüdə çıxdıqdan sonra rəsmi ədəbi fəaliyyətə başlayıb.
Yazıçının ilk əsərlərindən biri “Zoyka və onun Sanka dayısı” povesti olub. Daha sonra “Tənbəl ürək”, “İlk yağış”, “Şəhər bulka çörəyi”, “Şahin balaları”, “İsladılmış almalar” və “Rot Front” kimi hekayələri işıq üzü görüb.
Voskresenskaya əsərlərində təbiət, quşlar, uşaqlar və gündəlik həyatla yanaşı, şəxsi xatirələrinə də yer verib.
Onun “Fırtınalı dənizdə qız” povestində İkinci Dünya müharibəsi illərində xaricdə yaşayan sovet uşağının həyatından bəhs olunur. Əsərin qəhrəmanı əvvəlcə valideynləri ilə İsveçdə yaşayır, daha sonra Şimal Buzlu okeanından keçən gəmi karvanının tərkibində vətəninə qayıdır.
Povestin süjet xətti yazıçının şəxsi müşahidələri və yaşantıları əsasında qurulub.
Voskresenskaya müharibədən əvvəlki 1930-cu illərdə Finlandiyada çalışan sovet diplomatlarının fəaliyyətindən bəhs edən “Konsul” adlı avtobioqrafik roman da qələmə alıb.
Lakin sovet uşaqları arasında o, daha çox Vladimir Leninin uşaqlıq və gənclik illərindən, eləcə də ailəsindən bəhs edən hekayələri ilə tanınıb.
Yazıçı “Buzlu dumanın içindən” əsərində Lenin və Nadejda Krupskayanın yetkinlik dövründəki həyatından və inqilabi fəaliyyətindən bəzi epizodları təsvir edib.
Ədəbi yaradıcılığına görə Voskresenskaya SSRİ Dövlət mükafatı, Lenin komsomolu mükafatı və Qırmızı Əmək Bayrağı ordeni də daxil olmaqla müxtəlif mükafatlarla təltif edilib.
1990-cı illərin əvvəllərində kəşfiyyatçı kimi fəaliyyətinin rəsmi şəkildə məxfilikdən çıxarıldığını öyrənən yazıçı xatirələrini qələmə almağa qərar verib.
Nəticədə “İrina təxəllüsü ilə” və “İndi həqiqəti deyə bilərəm” adlı iki avtobioqrafik kitab üzərində işləyib.
Sonuncu əsər 1992-ci il yanvarın 8-də vəfat edən yazıçının ölümündən sonra nəşr olunub.
00:01 07.11.2026
Oxunuş sayı: 37
