Xarici xəbərlər
Fransada mağazadan 750 min avroluq siqaret oğurlanıb
Fransanın Vitrol şəhərində iki naməlum şəxs topdansatış mağazasının rəhbərini partlayıcı kəmərlə hədələyərək təxminən 750 min avro dəyərində siqaret oğurlayıb.
Crossmedia.az xəbər verir ki, “Maritima” portalı bu barədə kommunanın polis məlumatlarına istinadən xəbər yayıb.
Hadisə noyabrın 5-də bir neçə logistika anbarının yerləşdiyi sənaye zonasında baş verib. Hücum edənlər mağaza rəhbərini itaətə məcbur etmək üçün ona həqiqi və ya maket partlayıcı kəmər taxıblar. Polis məlumatına görə, cinayətkarlar ərazini tərk etdikdən sonra kişi kəməri özü çıxarıb. Onun sonrakı taleyi barədə məlumat yoxdur.
Hücum edənlər 220 qutu siqareti iki “Renault Master” markalı avtomobilə yükləyərək hadisə yerindən uzaqlaşıblar. İlkin məlumata görə, dəymiş ziyanın məbləği 700–750 min avro qiymətləndirilir.
İstintaq Banditizmə Qarşı Mübarizə Briqadasına (BRB) həvalə edilib. Hüquq-mühafizə orqanları şübhəlilərin şəxsiyyətini müəyyənləşdirmək üçün müşahidə kameralarının görüntülərini araşdırır.
Fransa mediasının məlumatına görə, hadisə ölkədə bəzi tütün məhsullarının qiymətinin aşağı salınmasından bir neçə gün sonra baş verib. Noyabrın 1-dən etibarən bəzi siqaret qutularının qiyməti 30–40 avrosent azalıb.
Qeyd edək ki, daha əvvəl “Bugatti” şirkətinin rəhbərinin avtomobilinin oğurlanması anı videoya düşüb.
22:12 06.11.2026
Oxunuş sayı: 81
