Xarici xəbərlər
Fransada kriptovalyuta oğurluğuna görə ukraynalı 5 il həbs cəzası alıb
Fransa məhkəməsi Holograph kriptoplatformasından 1 milyard rəqəmsal token oğurlamaqda təqsirləndirilən Ukrayna vətəndaşı Vitali K.-nı 5 il müddətinə azadlıqdan məhrum edib.
Crossmedia.az xəbər verir ki, “Le Figaro” bu barədə məlumat yayıb.
Təyin olunan cəzanın 3 ili real həbs, 2 ili isə şərti olacaq. Məhkəmə, həmçinin Ukrayna vətəndaşını 600 min avro məbləğində cərimələyib. Prokurorluq 5 il ciddi rejimli həbs, 800 min avro cərimə və Fransaya 5 il müddətinə giriş qadağası tələb etmişdi.
Məhkumun vəkili Robin Bensar qərarı qənaətbəxş hesab edib. O bildirib ki, cəza ittiham tərəfinin tələb etdiyindən xeyli azdır və bu, müvəkkilinin yaxın aylarda azadlığa çıxmasına imkan verəcək.
Vitali K.-nın iki əlbir şəxsi də 2 il həbs cəzası alıb. Onlardan birinə 14 ay şərti həbs və 80 min avro, digərinə isə tam şərti həbs və 40 min avro cərimə təyin edilib. Hər üç şəxs ittihamları qəbul etməyib.
İstintaqın versiyasına görə, Vitali K. “Holograph” şirkətində kənar məsləhətçi kimi çalışıb və tokenin texniki hazırlanmasına cavabdeh olub. 2023-cü ilin oktyabrında müqaviləsi ləğv edildikdən sonra onun sistemə inzibati giriş imkanını saxladığı iddia olunur.
2024-cü il iyunun 13-də naməlum hesab vasitəsilə “Holograph” platformasında 1 milyard token yaradılıb və onlar bir neçə kriptovalyuta cüzdanı vasitəsilə köçürülüb. “Europol” həmin gün istintaqa qoşulub. Fransanın kibercinayətkarlıqla mübarizə qurumu Parisdə yaşayan ukraynalının izinə qısa müddətdə düşüb. Şübhəli 2024-cü ilin avqustunda İtaliyada saxlanılıb və Fransaya ekstradisiya edilib.
Məhkəmədə susqunluğunu qoruyan Vitali K.-nın müdafiəsi hadisənin Holograph protokolundakı zəiflikdən qaynaqlana biləcəyini, bunun sistemə müdaxilə olmadığını irəli sürüb.
Tokenlərin böyük həcmdə yaradılması kriptovalyutanın məzənnəsinin 80 faizdən çox düşməsinə səbəb olub. “Vanity Fair” nəşrinin yazdığına görə, şirkət hadisənin nəticələrindən hələ də qurtula bilməyib və ləğv olunmağa hazırlaşır. Kayman adalarının hakimiyyət orqanları vəsaitin bir hissəsini zərərçəkən tərəfə qaytarıb.
Qeyd edək ki, daha əvvəl “Kaspersky” şirkəti “Binance” platformasına APT qrupunun hücum etmiş ola biləcəyini istisna etməyib.
22:01 06.11.2026
Oxunuş sayı: 86
