Ölüm də bahalaşıb - Son mənzilin qiyməti 25 min manata təklif olunur
İnsan dünyasını dəyişir, yaxınları isə onu son mənzilə yola salmaq üçün bu dəfə torpaq axtarışına çıxır. Bəzən dərd, kədər və itkinin ağrısı ilə yanaşı, bir də məzar yeri tapmaq, onun qiymətini ödəmək qayğısı başlayır. Bakıda qəbir yerlərinin qiymətinin 1500 manatdan başlayaraq 25 min manatadək yüksəldiyi bildirilir. Belə çıxır ki, insanın son mənzilə yola salınması da bəziləri üçün gəlir mənbəyinə çevrilib.
Ən ağrılı məqam isə odur ki, yaxınını itirmiş ailələr belə bir vəziyyətdə qiymət müzakirə etməyə, pul axtarmağa, maddi imkanlarını ölçüb-biçməyə məcbur qalırlar. Halbuki söhbət adi torpaq sahəsindən, daşınmaz əmlakdan deyil, insanın dəfn olunacağı son yerdən gedir. Ölüm üzərindən qazanc əldə etmək cəhdi isə cəmiyyətin həm hüquqi, həm də mənəvi dəyərləri ilə ziddiyyət təşkil edir.
Maraqlıdır ki, mövcud qanunvericilik vətəndaşların dəfni üçün qəbir yerlərinin ödənişsiz ayrılmasını nəzərdə tutur. Nazirlər Kabinetinin təsdiq etdiyi qaydalara əsasən, hər qəbir üçün 5 kvadratmetr sahə pulsuz verilməlidir. Ödəniş yalnız cənazənin yuyulması və dəfnə hazırlanması, daşınması, qəbir yerinin qazılması və qanunla müəyyən edilmiş digər xidmətlərə görə tələb oluna bilər.
Ətraflı süjetdə:
16:45 03.11.2026
Oxunuş sayı: 90
