Almaniyada casusluq qalmaqalı: MI6 məxfi məlumatlarını yoxlayır
Britaniyanın MI6 kəşfiyyat xidməti Almaniyanın Federal Kəşfiyyat Xidmətinin (BND) keçmiş rəhbəri Avqust Hanningin casusluqda şübhəli bilinərək saxlanılmasından sonra daxili araşdırmaya başlayıb.
Crossmedia.az xəbər verir ki, “The Telegraph” bu barədə məlumat yayıb.
Nəşrin məlumatına görə, Britaniya xüsusi xidmət orqanları Hanningin fəaliyyəti ilə bağlı araşdırma çərçivəsində Britaniyanın məxfi məlumatlarının yayılıb-yayılmadığını və agentlərin təhlükə altında olub-olmadığını müəyyənləşdirməyə çalışır.
Almaniyanın təhlükəsizlik strukturlarındakı mənbələr Hanningin işlədiyi bəzi məxfi məlumatların xarici tərəfdaş kəşfiyyat xidmətlərindən əldə edildiyini bildiriblər. Bu isə Britaniya və ABŞ xüsusi xidmətlərinin də məlumatlarının təhlükəyə məruz qala biləcəyi ehtimalını gündəmə gətirib.
Bildirilir ki, Hanningin saxlanılmasından sonra MI6, Britaniyanın Hökumət Rabitə Mərkəzi (GCHQ) və ABŞ-nin bir sıra qurumları həmin dövrdə Avropadakı müttəfiqlərə ötürülmüş məxfi məlumatlarla bağlı geniş daxili yoxlamaya başlayıblar.
Hanning oktyabrın 6-da xarici dövlətin xeyrinə casusluq etmək və dövlətə xəyanətdə şübhəli bilinərək saxlanılıb. İstintaqın versiyasına görə, o, 2005-ci ildə BND rəhbəri vəzifəsindən ayrıldıqdan sonra pul qarşılığında müxtəlif sənədləri, o cümlədən İranın nüvə proqramı və Rusiya ordusu ilə bağlı olduğu iddia edilən məlumatları ötürüb.
22:09 07.10.2026
Oxunuş sayı: 56
