Xarici xəbərlər

Britaniya düşmən peyklərini bloklamağa başlayıb

Britaniya hərbi qüvvələri mümkün düşmən təhdidlərindən qorunmaq üçün digər ölkələrə məxsus peyklərin fəaliyyətini məhdudlaşdırmaq və onların siqnallarını bloklamaq imkanına malikdir.

Crossmedia.az xəbər verir ki, bu barədə BBC məlumat yayıb.

Məlumata görə, Britaniya Kral Hərbi Hava Qüvvələri (RAF) son bir ildə yerüstü elektron müharibə sistemindən istifadə edir. Müdafiə mənbəsi sistemin artıq potensial rəqiblərin qarşısını almaq məqsədilə tətbiq edildiyini bildirib.

Sistemin digər ölkələrin peyklərinin Britaniyanın nüvə silahı daşıyan sualtı qayıqlarının hərəkətini və ya xüsusi təyinatlı qüvvələrin əməliyyatları kimi həssas hərbi fəaliyyətləri izləməsinin qarşısını almaq üçün istifadə oluna biləcəyi bildirilir.

Britaniya Müdafiə Nazirliyi peyklərə qarşı düşmən təhdidlərini “pozmaq, zəiflətmək və qarşısını almaq” məqsədilə yeni Kosmik Effektlər Eskadronunun yaradıldığını açıqlayıb. Bölmə raket hücumları barədə xəbərdarlıq edən, rabitəni təmin edən və gəmilərin istiqamətləndirilməsinə kömək edən Britaniya peyklərinin qorunmasına cavabdeh olacaq.

Müdafiə naziri Ues Stritinq isə kosmosdakı təhdidlərin miqyas, sürət və mürəkkəblik baxımından artdığını bildirib. Onun sözlərinə görə, GPS sisteminin itirilməsi Britaniya iqtisadiyyatına gündəlik 1,4 milyard funt sterlinq zərər vura bilər.

Məlumata görə, bir sıra ölkələrin də peyklərə qarşı oxşar yerüstü sistemləri var. ABŞ ötən həftə öz peyklərini qorumaq üçün kosmosda naməlum “silah” yerləşdirdiyini ilk dəfə təsdiqləyib.

🖨 Çap et

23:18 23.09.2026

Oxunuş sayı: 54