Braziliya Prezidenti Trampı “imperator kimi davranmaqda” ittiham edib
Braziliya Prezidenti Luiz İnasio Lula da Silva ABŞ Prezidenti Donald Trampın siyasətini tənqid edərək onun “imperator kimi davrandığını” bildirib.
Crossmedia.az xəbər verir ki, Braziliya Prezidenti bu barədə açıqlama verib.
Lula da Silva qeyd edib ki, Tramp ABŞ prezidenti seçilib və ölkəsini idarə etmək hüququna malikdir, lakin digər ölkələri idarə etmək və onlara öz iradəsini qəbul etdirmək hüququ yoxdur.
“Biz müdaxilə istəmirik. Biz tərəfdaşlıq istəyirik. Trampın davranışında birtərəfli yanaşmaya açıq meyl var. Bu, çox təhlükəlidir”, - Braziliya Prezidenti deyib.
Onun sözlərinə görə, belə yanaşma nəticəsində ən güclü iqtisadiyyata, ən çox silaha və ya ən böyük texnoloji imkanlara malik ölkənin üstünlük qazanması mümkündür.
Lula da Silva ticarətin balanslı olmalı olduğunu vurğulayıb. O, ölkələr arasında ticarətin qarşılıqlı xarakter daşımalı və ciddi disbalansların qarşısını almaq üçün müəyyən tarazlıq təmin edilməli olduğunu bildirib.
Braziliya Prezidenti ABŞ və Venesuela münasibətlərinə də toxunub. Onun sözlərinə görə, sənədlər və razılaşmalar ABŞ-nin Venesuelaya göstəriş verdiyi təəssüratını yaradır.
“Başqa sözlə, ölkənin suverenliyinə son qoyulub. Bu, yaxşı deyil. Bu, ABŞ üçün də, Venesuela üçün də, demokratiya üçün də yaxşı deyil”, - Lula da Silva bildirib.
Braziliya Prezidenti Trampın idarəçilik üslubunu da tənqid edib: “O, imperator kimi davranır. Mən belə idarəçilik üsulu ilə razı deyiləm. Bu, ‘Mən güclüyəm, daha böyüyəm, daha varlıyam, istədiyimi edə bilərəm, digərləri isə mənə tabe olmalıdır’ yanaşmasıdır. Buna güclünün qanunu deyilir. Mən belə qanunla razı deyiləm”.
14:44 22.09.2026
Oxunuş sayı: 30
