Brent neftinin qiyməti 11 günün minimumuna düşüb
Sentyabrın 21-də keçirilən hərraclar zamanı Şimal dənizindən hasil olunan Brent markalı neftin fyuçerslərinin qiyməti son 11 günün ən aşağı səviyyəsinə düşüb.
Crossmedia.az xəbər verir ki, “Investing” bu barədə məlumat yayıb.
Moskva vaxtı ilə saat 12:30-da Brent neftinin qiyməti 101,95 dollaradək geriləyib. Bu, əvvəlki ticarət sessiyasının bağlanış qiyməti ilə müqayisədə 1,85 faiz və ya 1,92 dollar azalma deməkdir. Gün ərzində qiymət minimum 101,21 dollar olub.
Neft qiymətlərindəki eniş əsasən ABŞ və İran arasında diplomatik danışıqlarla bağlı yaranan ehtimallar və Səudiyyə Ərəbistanının neft ixracının qismən bərpası ilə əlaqələndirilir. ABŞ Prezidenti Donald Tramp İran Prezidenti Məsud Pezeşkianla bu həftə Nyu-Yorkda keçiriləcək BMT Baş Assambleyasının toplantısı çərçivəsində görüşə açıq olduğunu bildirib.
Bazar iştirakçıları həmçinin Səudiyyə Ərəbistanının neft tədarükünün bərpasını izləyirlər. Bu amil Yaxın Şərqdə davam edən gərginliyin yaratdığı neft tədarükü risklərinin müəyyən qədər azalmasına səbəb olub.
13:46 21.09.2026
Oxunuş sayı: 57
