Xarici xəbərlər

BMT yarışında namizədliyini geri götürən şəxs məlum oldu

Çilinin keçmiş prezidenti Mişel Baçelet BMT-nin baş katibi vəzifəsinə namizədliyini geri götürüb.

Crossmedia.az xəbər verir ki, Baçelet bu barədə “Instagram” hesabında məlumat yayıb.

Qərar BMT Təhlükəsizlik Şurasında keçirilən üçüncü qeyri-rəsmi səsvermədən sonra verilib. Baçelet səkkiz namizəd arasında yeddinci yeri tutub. Son səsvermədə onun namizədliyini bir ölkə dəstəkləyib, 11 ölkə əleyhinə çıxıb, üç ölkə isə mövqe bildirməyib.

Baçelet iyul ayında keçirilən səsvermədə altı, avqustda isə iki dəstək səsi almışdı.

O, qərarını açıqlayarkən seçkilərin mürəkkəb beynəlxalq vəziyyət fonunda keçirildiyini bildirib. Keçmiş prezident dünyada çoxtərəfli əməkdaşlıq prinsiplərinin zəiflədiyini, beynəlxalq hüququn pozulduğunu və iqlim dəyişikliyi ilə bağlı elmi faktların inkar edildiyini qeyd edib.

BMT-nin yeni baş katibinin seçilməsi Təhlükəsizlik Şurasında namizədin razılaşdırılmasından və daha sonra Baş Assambleya tərəfindən təsdiqlənməsindən sonra başa çatacaq. Hazırkı baş katib Antonio Quterreşin səlahiyyət müddəti 2026-cı ilin sonunda başa çatır.

🖨 Çap et

09:33 20.09.2026

Oxunuş sayı: 49