Kürşat Zorlu: Türk Dünyası ölkələri arasında ticarətin payını qısa müddətdə qaldırmalıyıq
Türk dünyası birliyinin iqtisadi sütunlarını möhkəmləndirmək və ölkələrimiz arasında ticarət həcmini artırmaq lazımdır.
Crossmedia.az xəbər verir ki, bunu Ədalət və İnkişaf Partiyasının (AK Parti) sədr müavini, Türk Dövlətləri ilə Əlaqələr üzrə sədr Kürşat Zorlu Türk Dövlətləri Təşkilatının Aparıcı Milli Analitik Mərkəzlərinin II Beynəlxalq Konfransında çıxışı zamanı deyib.
O qeyd edib ki, dünya qlobal böhranlar və xaoslarla qarşı-qarşıyadır.
“Geosiyasi risklər artır və qeyri-sabitliklə üz-üzəyik. Belə bir dövrdə hər bir ölkə üçün kənd təsərrüfatında milliləşməni təmin etmək, ərzaq təhlükəsizliyini ön plana çıxarmaq, etibarlı logistika və qlobal xətlər daxilində özümüzə məxsus dəhliz mövqeyini formalaşdırmaq, müdafiə sənayesində dünyada fərq yaradaraq daxili resurslarımızı hərəkətə keçirmək vacibdir. Bunlar artıq hər bir ölkə üçün strateji təhlükəsizlik məsələsinə çevrilib”, – deyə o bildirib.
K. Zorlu vurğulayıb ki, Türk Dünyası ölkələrinin öz aralarındakı ticarətinin ümumi ticarətdəki payı hazırda təxminən 7%-dən bir qədər çoxdur. Onun sözlərinə görə, bir neçə il əvvəl 3% ətrafında olan bu nisbətin yüksəlməsi müsbət nəticədir.
“Lkin mövcud iqtisadi potensialımızı nəzərə aldıqda, qısa müddətdə bu göstəricini 10%-dən yuxarı çıxarmaq kimi bir öhdəliyimiz var. Artıq sadəcə öz aramızda mal satmaq üzrə hədəflər qoymaq əvəzinə, birlikdə istehsal etməli və maliyyələşdirməliyik.
Qlobal ticarətdə getdikcə daha strateji xarakter alan Orta Dəhliz xüsusi əhəmiyyətə malikdir. Bu gün Orta Dəhliz təkcə bizim üçün deyil, dünyanın qlobal riskləri azaltması baxımından da böyük əhəmiyyət kəsb edir.
Xəzər keçidli bu marşrut yalnız Şərq ilə Qərb arasında təhlükəsiz və sürətli daşınma xətti təqdim etməklə kifayətlənmir, eyni zamanda Türk Dünyasının qlobal iqtisadiyyata daha güclü inteqrasiyasını təmin edəcək”, – deyə o əlavə edib.
Ayhan
10:50 16.09.2026
Oxunuş sayı: 42
