Ruslan Əlixanov "Yüksəliş" müsabiqəsinin qalibləri ilə görüşüb
Mentorluq proqramı çərçivəsində Azərbaycan İnvestisiya Holdinqinin Baş icraçı direktoru Ruslan Əlixanovun müsabiqə qalibləri ilə yekun görüşləri keçirilib.
Crossmedia.az xəbər verir ki, o, üçüncü "Yüksəliş" müsabiqəsinin qalibləri - Şahin Mahmudzadə ilə qarşılıqlı, Mirzə Ələkbər Babayevlə isə onlayn görüş zamanı onların hazırkı fəaliyyət sahələri ilə maraqlanaraq mentor kimi peşəkar inkişafları ilə bağlı öz təcrübə və tövsiyələrini bölüşüb.
Görüş zamanı maraq doğuran mövzular ətrafında geniş müzakirələr və gələcəkdə birgə fəaliyyət haqqında fikir mübadiləsi aparılıb.
Yekun olaraq, Ruslan Əlixanov müsabiqə qaliblərinə gələcək iş həyatında uğurlar arzulayıb. Qaliblər isə öz növbələrində görüşün səmimiliyinə görə təşəkkür edərək, birillik şəxsi inkişaf planı çərçivəsində mentorla keçirilmiş görüşlərin çox faydalı olduğunu vurğulayıblar.
"Yüksəliş" müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixli Sərəncamı ilə təsis edilib. Müsabiqənin qalibləri mentorlar tərəfindən birillik fərdi inkişaf planı ilə təmin olunur və 20 min manatlıq mükafat qazanırlar.
Dördüncü “Yüksəliş” müsabiqəsinin keçirilməsi barədə Azərbaycan Respublikasının Prezidenti cənab İlham Əliyev 25 dekabr 2023-cü il tarixində müvafiq Sərəncam imzalayıb.
11:32 27.12.2024
Oxunuş sayı: 3382
