Çimərliklərdə yetəri qədər təhlükəsizlik tədbiri görülmür - Rəy
Yay mövsümünün başlaması ilə çimərliklərdə təhlükəsizlik məsələsi yenidən gündəmə gəlib. Buna baxmayaraq, bu il çimərliklərdə suda boğulma halları ciddi narahatlıq doğurur. Rəsmi məlumata görə, indiyədək 40 nəfərin meyiti sudan çıxarılıb, 55 nəfər isə xilas edilib. Bu statistika görülən profilaktik tədbirlərin effektivliyi ilə bağlı suallar yaradır. Bəs bu qədər xəbərdarlıq, maarifləndirmə kampaniyaları və təhlükəsizlik tədbirlərinə baxmayaraq, niyə acı nəticələrin qarşısını tam almaq mümkün olmur?
Mövzu ilə bağlı təhlükəsizlik eksperti Samir Nəbiyev Crossmedia.az-a açıqlama verib:
“Bu rəqəmlərə nəzər saldıqda belə bir nəticəyə gəlmək olur ki, burada əsas problem önləyici tədbirlərin yetərli səviyyədə həyata keçirilməməsidir. Önləyici tədbirlər dedikdə isə ilk növbədə qadağaların tam şəkildə tətbiq olunmaması, maarifləndirmə işlərinin lazımi səviyyədə aparılmaması və vətəndaşların müəyyən edilmiş təhlükəsizlik tələblərinə tam əməl etməməsi nəzərdə tutulur. Maarifləndirmə işləri aşağı səviyyədə və ya davamlı xarakter daşımadıqda, bu cür hadisələrin təkrarlanması qaçılmaz olur. Nəticədə hər il, xüsusilə yay mövsümündə belə hadisələrin sayında artım müşahidə edilə bilər”.
Ekspert əlavə edib ki, burada əsas məsuliyyət nəzarət orqanlarının üzərinə düşür: “Çimərliyə girişin qadağan olunduğu ərazilərə nəzarət gücləndirilməli, spirtli içki qəbul etmiş şəxslərin təhlükəli zonalara daxil olmasının qarşısı alınmalı, eyni zamanda dənizdə xüsusi nişanlarla müəyyən edilmiş təhlükəsizlik sərhədlərinə ciddi şəkildə əməl olunması təmin edilməlidir. Vətəndaşlar həmin nişanları keçməməli və müəyyən edilmiş qaydalara riayət etməlidirlər. Hesab edirəm ki, bu istiqamətdə maarifləndirmə tədbirlərinin əhatə dairəsi daha da genişləndirilməli, nəzarət mexanizmləri gücləndirilməli və paralel olaraq vətəndaşlar təhlükəsizlik qaydalarına ciddi əməl etməyə davamlı şəkildə çağırılmalıdırlar”.
Ayhan
19:30 04.08.2026
Oxunuş sayı: 71
