Zelenski: ABŞ və Avropa Ukraynaya “Patriot” raketləri verməlidir
Ukrayna Prezidenti Volodimir Zelenski müttəfiqlərini ölkəsinə “Patriot” hava hücumundan müdafiə sistemləri üçün raketlər verməyə və Rusiyaya qarşı yeni sanksiyalar tətbiq etməyə çağırıb.
Crossmedia.az xəbər verir ki, "Ukrainska Pravda" bu barədə məlumat yayıb.
Zelenski bildirib ki, dünyada “Patriot” raketləri mövcuddur və əsas məsələ tərəfdaşların onların Ukraynaya verilməsi ilə bağlı siyasi qərar qəbul etməsidir.
“ABŞ bizim nəyə ehtiyacımız olduğunu bilir. Avropa da bunu bilir. Ballistik raketlərə qarşı müdafiə vasitələri insanları qorumaq üçündür, anbarlarda saxlanmaq üçün deyil. Bu həyati əhəmiyyətli yardımın hər gecikən günü Rusiyaya insanlarımızı öldürmək üçün yeni imkan yaradır”, – deyə o vurğulayıb.
Prezident Rusiyaya qarşı əlavə sanksiyaların tətbiq edilməsinin vacibliyini qeyd edərək bildirib ki, ballistik silahların istehsalına, raket buraxılış qurğularına və onların komponentlərinin təminatına dəstək verən bütün hüquqi və fiziki şəxslər təkcə Ukrayna deyil, tərəfdaş ölkələr tərəfindən də sanksiyaya məruz qalmalıdır.
Zelenski yaxın vaxtlarda Ukraynanın səfirləri ilə qlobal müşavirə keçiriləcəyini açıqlayıb. Onun sözlərinə görə, əsas məqsəd Ukraynaya silah tədarükünün artırılması və Rusiyaya qarşı sanksiyaların gücləndirilməsi ilə bağlı konkret nəticələr əldə etməkdir.
Ukrayna lideri həmçinin ABŞ ilə aparılan danışıqlarda iştirak edən nümayəndə heyətinin üzvləri – Rustem Umerov, Kirilo Budanov, Sergey Kislitsa və Pavlo Palisa ilə diplomatik tapşırıqları müzakirə etdiyini bildirib.
“Ümid edirəm ki, qarşıdakı həftələr boşa keçməyəcək. ABŞ necə effektiv olmağı bilir”, – deyə Zelenski əlavə edib.
19:00 02.08.2026
Oxunuş sayı: 110
