Suriya və İran arasında vəziyyət daha da gərginləşə bilər
Suriya ilə İran arasında gərginlik artmağa davam edir. Rəsmi Dəməşq İranın ölkə daxilindəki hərbi və siyasi təsirinə qarşı sərt xəbərdarlıq edib. Suriya hökuməti, İrandan öz maraqlarını qorumaq məqsədilə ölkə daxilindəki fəaliyyətlərini dərhal dayandırmağı tələb edib.
Mövzu ilə bağlı politoloq Oqtay Qasımov Crossmedia.az-a açıqlama verib.
Onun sözlərinə görə: “Suriya Xarici İşlər Nazirinin İranla bağlı səsləndirdiyi fikirlər əlbəttə ki, diqqətə layiqdir. Belə ki, İranın dini lideri bir neçə gün öncə açıq şəkildə suriyalı gənclərə müraciət edərək ölkədə xaos yaratmağa və yeni hakimiyyətə gəlmiş qüvvələri devirməyə çağırıb. Bu da bir ölkənin daxili işlərinə açıq şəkildə müdaxilə deməkdir və faktiki olaraq ölkədə normallaşmağa mane olmaq cəhdidir. Bu addım, təbii ki, Suriyanın yeni hökuməti tərəfindən ciddi narazılıqla qarşılanır. Çünki İran son 14 il ərzində, xüsusilə Suriyada baş verən hadisələrdə, Əsəd rejimini dəstəkləyən əsas qüvvələrdən biri kimi, Suriyada törədilən bütün cinayətlərdə iştirak edib. Həmçinin, vətəndaş müharibəsi zamanı təxminən 700 minə yaxın suriyalının qətlində İranın da əli var”.
Oqtay Qasımov bildirib ki, “Suriyada hakimiyyət dəyişikliyi İranın bölgədəki rolunu ciddi şəkildə zəiflədib və bu vəziyyətlə İran barışa bilmir. Təbii ki, Suriyanın yeni Xarici İşlər Nazirliyinin bu bəyanatı iki ölkə arasında münasibətlərin gərginliyindən xəbər verir. Onsuz da gərgin olan münasibətlərin bundan sonra daha da gərginləşəcəyi ehtimal edilir. Çünki İran dayanmayacaq. 40 ildən artıqdır ki, Livanda və Suriyada formalaşdırdığı tərəfdaş qrupları ilə birlikdə Suriyanın daxilində prosesləri əngəlləməyə və hökuməti zəiflətməyə çalışacaq. Bu isə tərəflər arasında gərginliyin davam edəcəyinə işarədir”.
Fidan Hacızadə
17:33 26.12.2024
Oxunuş sayı: 22220
