Azərbaycan və Gürcüstan arasında ekstradisiya istiqamətində səmərəli əməkdaşlıq qurulub- Əliməmməd Nuriyev
Azərbaycan və Gürcüstan arasında strateji tərəfdaşlıq təkcə siyasi və iqtisadi sahələri deyil, hüquq-mühafizə orqanları arasında əməkdaşlığı da əhatə edir. Gürcüstanın Baş prokurorunun Bakıya səfəri iki ölkə arasında hüquqi əməkdaşlığın daha da dərinləşdirilməsi baxımından diqqət çəkir.
Azərbaycan Respublikasının Milli Məclisinin II çağırış deputatı, "Konstitusiya" Araşdırmalar Fondunun prezidenti və Daxili İşlər Nazirliyi yanında İctimai Şuranın sədri Əliməmməd Nuriyev Crossmedia.az-a açıqlamasında bildirib ki, Gürcüstanın Baş prokurorunun Bakıya səfərini yalnız protokol xarakterli görüş kimi qiymətləndirmək düzgün deyil:
"Bu səfərin əsas diqqətçəkən məqamı ondan ibarətdir ki, müzakirələr ümumi əməkdaşlıq bəyanatlarından daha çox region üçün aktual olan iki mühüm istiqamət, kibercinayətkarlıqla mübarizə və ekstradisiya sahəsində əməkdaşlığın gücləndirilməsi üzərində qurulub. Bu isə təsadüfi seçim deyil".
Ekspert qeyd edib ki, kibercinayətkarlıq müasir dövrdə transmilli cinayətkarlığın ən sürətlə inkişaf edən istiqamətlərindən birinə çevrilib:
"Elektron fırıldaqçılıq, şəxsi məlumatların oğurlanması, bank kartları və kriptovalyutalar vasitəsilə törədilən cinayətlər artıq bir ölkənin sərhədləri daxilində araşdırıla bilmir. Server bir ölkədə, cinayətkar başqa ölkədə, zərərçəkən isə üçüncü ölkədə ola bilər. Belə hallarda elektron sübutların operativ əldə olunması və hüquq-mühafizə orqanları arasında məlumat mübadiləsi həlledici əhəmiyyət daşıyır".
Ə.Nuriyev vurğulayıb ki, ekstradisiya sahəsində əməkdaşlığın gücləndirilməsi də xüsusi önəm kəsb edir:
"Cinayət törətdikdən sonra başqa ölkəyə qaçan şəxslərin geri qaytarılması prosedurları bəzən aylarla, hətta illərlə davam edir. Hüquqi mexanizmlərin təkmilləşdirilməsi və qarşılıqlı əməkdaşlığın gücləndirilməsi cinayətkarların məsuliyyətdən yayınmaq imkanlarını əhəmiyyətli dərəcədə azalda bilər".
Deputat əlavə edib ki, Azərbaycan və Gürcüstan arasında bu sahədə artıq formalaşmış uğurlu əməkdaşlıq mövcuddur:
"Hər iki ölkə arasında ekstradisiya istiqamətində səmərəli əməkdaşlıq qurulub. Tez-tez müşahidə edirik ki, cinayət törətməkdə təqsirləndirilən şəxslər qarşılıqlı şəkildə təhvil verilir. Bununla belə, bu əməkdaşlığın daha da dərinləşdirilməsinə və prosedurların sürətləndirilməsinə ehtiyac var".
Ekspert bildirib ki, hüquq-mühafizə orqanları arasında koordinasiyanın gücləndirilməsi Orta Dəhlizin təhlükəsizliyi baxımından da mühüm əhəmiyyət daşıyır:
"Azərbaycan və Gürcüstan Orta Dəhlizin əsas iştirakçılarıdır. Ticarət və yükdaşımaların həcmi artdıqca qaçaqmalçılıq, saxta sənədlərdən istifadə və transmilli mütəşəkkil cinayətkarlıq riskləri də yüksəlir. Bu baxımdan hüquq-mühafizə orqanları arasında sıx koordinasiya həmin risklərin vaxtında müəyyənləşdirilməsi və qarşısının alınmasına xidmət edə bilər".
Ə.Nuriyev sonda qeyd edib ki, Bakı görüşünün əsas əhəmiyyəti əməkdaşlığın praktik istiqamətlər üzrə dərinləşdirilməsindədir:
"Növbəti mərhələdə siyasi iradənin konkret hüquqi sənədlər, yeni ikitərəfli sazişlər və icra mexanizmləri ilə möhkəmləndirilməsi vacibdir. Məhz bu addımlar Azərbaycan və Gürcüstan arasında strateji əməkdaşlığın hüquqi və təhlükəsizlik komponentini daha da gücləndirəcək".
Nigar Xəlilli
12:00 31.07.2026
Oxunuş sayı: 57
