Qərb ölkələri Suriyada bərpa işlərinə dəstək göstərəcəklər
Regionda son dövrlərdə baş verən dəyişikliklər fonunda Suriyada sabitlik və təhlükəsizliyin bərpası məsələləri gündəmə gəlib. Türkiyə NATO üzvü olaraq bu prosesdə getdikcə daha mühüm rol oynayır. Rusiya və İranın Suriyadan çəkilməsi ilə bu rol daha da güclənir. ABŞ və Qərb ölkələri Türkiyə ilə birgə hərəkət etmək üçün danışıqlara başlayıblar, bu isə Suriyada yenidənqurma və sivil həyatın bərpası üçün yeni imkanlar yaradır.
Mövzu ilə barədə siyasi şərhçi Vüqar Əhmədov Crossmedia.az-a fikirlərini bildirib: “Suriyada sabitlik və təhlükəsizliyin bərpası ümumilikdə uzun bir prosesdir. Region dövlətlərinin iştirakı olmadan bu, çətin görsənir. Hazırkı mərhələdə Suriyanın təhlükəsizliyinin əsas qarantı rolunda Türkiyə çıxış edə bilər. Rusiya və İranın Suriyadan çəkilməsi fonunda NATO üzvü olan Türkiyənin bu ölkədə rolu getdikcə artmaqdadır. ABŞ və Qərb ölkələri bu prosesdə Türkiyə ilə birgə hərəkət etmək üçün artıq danışıqlar aparır”.
Politoloq həmçinin qeyd edib ki, Suriyada sabitliyin bərpa olunması üçün ilk növbədə orada sivil həyatın bərpası, xarici donorlar tərəfindən davamlı humanitar və maliyyə yardımların göstərilməsi şərtdir: “Artıq bir sıra Qərb ölkələri Suriyada bərpa işlərinə dəstək göstərəcəyini bildiriblər. Hesab edirəm ki, siyasi dialoq, ölkənin yenidən sivil siyasi həyata qayıtması, yeni seçkilərin keçirilməsi və yeni siyasi sistemin qurulmasında Türkiyə aktiv rol alaraq bu ölkədə yenidənqurma prosesinə dəstəyini göstərəcək. Artıq bu istiqamətdə Suriyanın indiki hökuməti ilə fəal danışıqlar aparılır. Suriyanın gələcək sabitliyi və təhlükəsizliyi ölkədə sivil siyasi dialoq və suriyalı qaçqınların humanitar hüquqlarının bərpasından keçir. Bunun həyata keçirilməsi üçün Suriyada hazırkı iqtidarda olan qüvvələrin üzərinə böyük məsuliyyət düşür. Onlar altı aylıq keçid prosesində bu ölkəni yenidən sivil siyasi məcraya qaytarmaq üçün iş aparmalı və regional, eyni zamanda beynəlxalq aktorlarla yaxından əməkdaşlıq etməlidirlər. Şübhəsiz ki, Qərb ölkələrinin, ABŞ və Britaniya, Avropa İttifaqının bu istiqamətdə hesablanmış müəyyən addımları olacaqdır.
Düşünürəm ki, Suriyada artıq yeni bir dönəm başlayıb və bu dönəmdə Suriyanın yenidən qurulması üçün yeni imkanlar yaranır”.
Samirə Şərif
16:29 26.12.2024
Oxunuş sayı: 16547
