Böyük Britaniya İsraillə ticarət sazişini dayandırmağı nəzərdən keçirib
Böyük Britaniya hökuməti ötən il İsraillə imzalanmış ticarət sazişinin dayandırılması imkanını qiymətləndirib.
Crossmedia.az xəbər verir ki, "Sky News" bu barədə məlumat yayıb.
Məlumata görə, Böyük Britaniyanın Biznes və Ticarət Departamenti 2025-ci ilin avqustunda İsraillə 2019-cu ildə Brexitdən sonra imzalanmış Ticarət Tərəfdaşlığı Sazişinin dayandırılmasının iqtisadi və sosial nəticələrini araşdıran təsir qiymətləndirməsi hazırlayıb.
Nəşr qeyd edir ki, bu qiymətləndirmə Böyük Britaniyanın İsrail hökumətinin Qəzza zolağı və İordan çayının qərb sahilindəki hərəkətlərinə cavab tədbirlərindən biri olub.
2025-ci ilin mayında London İsraillə azad ticarət sazişi üzrə danışıqları dayandırsa da, mövcud ticarət sazişi qüvvədə saxlanılıb.
Həmin dövrdə Böyük Britaniyanın xarici işlər naziri Devid Lemmi İsrailin müdafiə nazirinin Qəzzanın “təmizlənməsi” və “qalan hissəsinin məhv edilməsi” ilə bağlı bəyanatlarını “iyrənc” və “dəhşətli” adlandırmışdı.
O vaxtkı ticarət naziri Kris Brayant isə parlamentdə bildirib ki, İsrailə ixrac Böyük Britaniyada minlərlə iş yerini dəstəkləyir və güzəştli ticarət rejiminin dayandırılması Britaniya şirkətləri üçün ciddi iqtisadi nəticələr yarada bilər.
10:26 23.07.2026
Oxunuş sayı: 56
