Kreml Azərbaycanla əsas fikir ayrılığının Ukrayna məsələsi olduğunu açıqlayıb
Rusiya Prezidentinin mətbuat katibi Dmitri Peskov Moskva ilə Bakı arasında əsas fikir ayrılığının Ukraynadakı vəziyyətə münasibətlə bağlı olduğunu bildirib.
Crossmedia.az xəbər verir ki, o, bu barədə keçirdiyi brifinqdə danışıb.
Peskovun sözlərinə görə, Rusiya və Azərbaycanın Ukrayna məsələsinə yanaşmaları fərqlidir. Bununla belə, Moskva praqmatik mövqeyə sadiq qalır və hesab edir ki, bu fikir ayrılığı iki ölkə arasındakı münasibətlərə mənfi təsir göstərməməlidir.
“Yaxın münasibətlərdə olduğumuz, lakin müəyyən məsələlərdə mövqelərimizi bölüşmədiyimiz bir sıra dövlətlər var. Bəli, bu, aramızdakı fikir ayrılığı mövzusudur”, – deyə Kremlin sözçüsü bildirib.
O vurğulayıb ki, Moskva bu məsələnin Rusiya–Azərbaycan münasibətlərinə kölgə salması üçün əsas görmür.
“Biz hesab edirik ki, bu məsələ ikitərəfli münasibətlərimizin qiymətləndirilməsində həlledici amil olmamalıdır. Burada praqmatik yanaşmaya üstünlük veririk”, – deyə Dmitri Peskov əlavə edib.
15:12 14.07.2026
Oxunuş sayı: 54
