Aİ Ukraynaya Britaniya silahlarını almağa icazə verəcək
Avropa İttifaqı Ukraynaya müdafiə ehtiyacları üçün ayrılmış 60 milyard avro vəsait hesabına Böyük Britaniya istehsalı olan silahları satın almağa icazə verməyə hazırlaşır.
Crossmedia.az xəbər verir ki, bu barədə "Bloomberg" məlumatlı mənbələrə istinadən yazıb.
Məlumata görə, bir neçə aydır hazırlanan Aİ-Böyük Britaniya sazişinin bazar ertəsi Parisdə keçiriləcək "İstəklilər Koalisiyası"nın toplantısında açıqlanacağı gözlənilir.
Əvvəlcə sənədin Aİ-Böyük Britaniya sammitində elan olunması planlaşdırılsa da, Böyük Britaniyanın Baş naziri Kir Starmerin istefası səbəbindən tarix dəyişdirilib.
Sazişə əsasən, Britaniya şirkətləri proqramda iştirak üçün sabit ödəniş etməyəcək. Onlar Ukraynanın satınalma zamanı məhsullarını seçməsindən asılı olaraq maliyyə vəsaiti əldə edəcəklər.
"Bloomberg" qeyd edir ki, Aİ Britaniya silahlarına çıxışın Ukraynanın müdafiə satınalmalarını asanlaşdıracağını və tərəflərin müdafiə sənayesi arasında inteqrasiyanı gücləndirəcəyini hesab edir.
Nəşrin yazdığına görə, Böyük Britaniyanın Aİ-nin müdafiə fonduna çıxışı ilə bağlı danışıqlar 150 milyard avroluq "SAFE" proqramı üzrə müzakirələrlə müqayisədə daha asan gedir. Həmin proqram üzrə razılaşma üzv ölkələrin maliyyə töhfələri ilə bağlı fikir ayrılıqları səbəbindən baş tutmamışdı.
17:05 10.07.2026
Oxunuş sayı: 48
