Ərdoğan Trampla danışdı: Cənubi Qafqaza yeni nizam gəlir
ABŞ Prezidenti Donald Trampla türkiyəli həmkarı Rəcəb Tayyib Ərdoğan arasında ötən gün baş tutan NATO dövlət və hökumət başçılarının Zirvə Toplantısı çərçivəsində keçirilən görüş beynəlxalq gündəmin əsas müzakirə mövzularından birinə çevrilib. Liderlərin danışıqlarında regional təhlükəsizlik, strateji əməkdaşlıq və qlobal proseslərlə yanaşı, Cənubi Qafqazın da müzakirə olunduğu ehtimal edilir. Regionun geosiyasi əhəmiyyəti fonunda isə bu məsələnin diqqətdən kənarda qalması mümkün deyil.
Mövzu ilə bağlı Crossmedia.az-a danışan politoloq Samir Hümbətov vurğulayıb ki, NATO-nun iki güclü ölkəsinin rəhbərləri arasında keçirilən görüşdə Cənubi Qafqaz da kənarda qala bilməzdi:
"Xüsusilə son dövrlər Cənubi Qafqaz və Yaxın Şərq uğrunda beynəlxalq səviyyədə bir mübarizənin getdiyini gördük. Çünki Cənubi Qafqaz strateji baxımdan çox mühüm əhəmiyyətə malik bir bölgədir. Buradan həm təbii resurslar hasil edilir, üstəlik Şərq-Qərb nəqliyyat dəhlizi də bu bölgədən keçir və bu, bölgənin gələcəyi baxımından çox vacibdir. Bu baxımdan Cənubi Qafqazın müzakirəsi bu iki ölkə üçün vacib məsələdir. Türkiyə Cənubi Qafqazın qonşu dövlətidir, ABŞ də Cənubi regionda maraqları olan gücdür. Üstəlik, Türkiyə ilə Azərbaycan arasında münasibətlərin artıq yüksək səviyyədə inkişaf etməsi də bu istiqamətdə müzakirələri aktuallaşdırır".
Politoloq hesab edir ki, Cənubi Qafqazın təhlükəsizliyi məsələsi, Ermənistan-Azərbaycan sülh müqaviləsinin imzalanması, təhlükəsizlik arxitekturasının qurulması, enerji təhlükəsizliyinin təmin olunması və nəqliyyat-kommunikasiya xətlərinə nəzarət Trampın diqqət mərkəzində olan məsələlərdəndir:
"Gürcüstanın da eyni zamanda burada aktiv şəkildə iştirak etməsi müzakirə olunan məsələlər sırasındadır. İranın Cənubi Qafqaza və Rusiyaya təsiri, həmçinin Çin, ABŞ və Qərbin regiondakı maraqları çərçivəsində həyata keçirmək istədikləri məsələlər də bu görüşün müzakirə predmetini təşkil edir. Burada konkret olaraq hansı addımların atılacağını demək doğru olmaz. Çünki strateji proseslərdə vəziyyət hər an dəyişə bilər. Ona görə də əsas diqqət yetiriləcək məsələ Cənubi Qafqazın bundan sonrakı təhlükəsizliyinin möhkəmləndirilməsidir. Bu isə Azərbaycanın və Ermənistanın mövqeyindən, eləcə də İranda baş verən proseslərdən asılıdır".
Fatimə Məmmədova
10:30 10.07.2026
Oxunuş sayı: 184
