COP29 - Azərbaycan bəşəriyyətin gələcəyini düşünür

COP29 ərəfəsində bir sıra beynəlxalq QHT-lər, o cümlədən “COP-da haqqını tələb et” koalisiyası, Azərbaycana qarşı qərəzli kampaniyalar aparmış və tələblər irəli sürmüşdür. Bu QHT-lərin əksəriyyəti Qərb ölkələrində yerləşir və maliyyələşmələri əsasən dövlət orqanları tərəfindən təmin edilir. Ermənistan isə COP29 çərçivəsində Azərbaycanın əleyhinə əks-təbliğat aparır və konfransı siyasi alətə çevirməyə çalışırdı. Bu fəaliyyətlər Azərbaycanın daxili işlərinə müdaxilə və beynəlxalq nüfuzuna zərbə vurmaq məqsədi güdürdü.

“Yaşıl Dünya” Ekoloji Maarifləndirmə İctimai Birliyinin sədri Elman Cəfərli məsələ ilə bağlı Crossmedia.az-a açıqlama verərək Azərbaycanın qlobal iqlim dəyişiklikləri ilə mübarizədə oynadığı rola diqqət çəkib. O bildirib: “Qlobal iqlim dəyişikliyinin nəticələrinin yumşaldılması ilə əlaqədar beynəlxalq səylərin artırıldığı bir dövrdə yaşayırıq. Qlobal istiləşmənin əsas səbəblərindən birinin insan faktoru olduğu artıq kiməsə sirr deyil. Artıq sübuta yetirilib ki, antropogen təsirlər nəticəsində atmosferdə istixana qazlarının – karbon dioksid, azot, metan və digər qazların miqdarı artıb. İnsan fəaliyyəti getdikcə dünyanı yaşanmaz bir hala gətirir. COP tədbirləri karbon emissiyasının azaldılması ilə bağlı təşəbbüslərin üzə çıxarılması üçün unikal bir platformadır. Azərbaycan COP29-u yüksək səviyyədə təşkil etdi. Çünki ölkəmiz qlobal iqlim dəyişiklikləri ilə bağlı vəziyyətin gerçəkdən vahim olduğunu anlayır və iqlim fəsadları ilə mübarizə proqramına sadiqdir.”

Elman Cəfərli həmçinin Azərbaycanın beynəlxalq təşəbbüslərə sadiqliyindən bəhs edərək deyib: “Azərbaycan 2015-ci ildə imzalanmış Paris razılaşmasına uyğun olaraq karbon emissiyasının azaldılmasını öhdəsinə götürüb. 2050-ci ilə qədər ölkəmiz 1990-cı baza ili ilə müqayisədə karbon emissiyasını 40 faizə qədər azaltmalıdır. Ölkəmiz qlobal iqlim dəyişikliyinə mitiqasiya (yumşaltma) və adaptasiya ilə bağlı beynəlxalq təşəbbüslərə dəstək verir. Son illər ölkəmizdə karbon emissiyasının azaldılması, bərpa olunan enerji zonalarının yaradılması istiqamətində önəmli layihələr icra olunub.”

O, COP29-da əldə olunan mühüm razılaşmalar barədə də danışıb: “COP29 qəbul olunan mühüm qərarlarla tarixə düşdü. Bu günə qədər mitiqasiya və adaptasiya tədbirlərinin həyata keçirilməsində Paris razılaşması əsas tutulurdusa, bundan sonra həm də COP29 Bakı konfransında qəbul olunmuş qərarlar əsas götürüləcək. Bakı konfransında 2015-ci ildən bəri ilk dəfə olaraq Paris Sazişinin 6-cı maddəsi tam şəkildə işlək vəziyyətə gətirilməsi ilə bağlı razılıq əldə olundu. Bu maddə ilə bağlı əldə olunan razılaşma ətraf mühitin qorunmasına ciddi yanaşmanı təmin edəcək. 6-cı maddə üzrə əməkdaşlıq qlobal iqlim dəyişikliyinin nəticələrinin yumşaldılması və uyğunlaşma tədbirlərini tənzimləyəcək. COP29-da əldə olunan mühüm razılaşmalardan biri də Bakı Maliyyə Məqsədinin qəbul olunmasıdır. Bu razılaşma hər il inkişaf etməkdə olan ölkələrə 1,3 trilyon dollar iqlim maliyyəsini yönəltməyi nəzərdə tutur.”

E.Cəfərli Azərbaycanın təşəbbüslərinə kölgə salan fəaliyyətləri pisləyərək bildirib: “Çox təəssüf ki, müasir dünyada hər kəs bəşəriyyətin gələcəyinə bizim qədər duyarlı yanaşa bilmir. 21-ci əsrdir, hələ də Fransa kimi dövlətlər imperialist siyasət aparır, xırda ada xalqları istibdad altında saxlayır, onlara zülm edir. Bizə qarşı əks-cəbhədə olan dairələr də bu cür dövlətlərdən qidalanır. Biz bəşəriyyətin gələcəyini düşünür, karbon emissiyasının azaldılmasını hədəfləyən qərarların qəbuluna, layihələrin icrasına can atırıq, onlar isə siyasi maraqlarını ortaya qoyurlar. Azərbaycanın karbon emissiyasının azaldılması, yaşıl enerjiyə keçidlə bağlı təşəbbüslərinə kölgə salan bütün fəaliyyətlər pislənməlidir. Çünki biz bu məsələnin, qlobal ekoloji böhranın ciddiyyətini anlayır, məsuliyyətimizi dərk edirik. Onlar üçün isə siyasi maraqları bəşəriyyətin taleyindən önəmlidir.”

Maral Şahverdili