ABŞ–İran razılaşması dünya güc balansını dəyişir
ABŞ və İran arasında əldə olunan memorandumda qeyd olunur ki, bu razılaşma Vaşinqtonun uzunmüddətli eskalasiyaya hazır olub-olmaması barədə suallar yarada bilər.
Crossmedia.az xəbər verir ki, “The National Interest” nəşrində yayımlanan analitik məqalədə ABŞ-nin İrana qarşı mümkün hərbi kampaniyası 1939–1940-cı illərin SSRİ–Finlandiya Qış müharibəsi ilə müqayisə edilir. Müəllifin fikrincə, hətta uğurlu nəticələnən hərbi əməliyyat belə rəqib dövlətlərdə böyük güclərin imkanlarının məhdudluğu barədə təsəvvür formalaşdıra bilər.
Analitik yazıda vurğulanır ki, ABŞ hərbi baxımdan məğlub olmayıb, lakin münaqişə tam sülh sazişi ilə deyil, yalnız müvəqqəti memorandumla başa çatıb. İranın nüvə və raket proqramı ilə bağlı əsas məsələlərin isə açıq qaldığı bildirilir.
Ekspertlərə istinadən qeyd olunur ki, Vaşinqtonun qərarlarına təkcə hərbi amillər deyil, həm də daxili siyasi ixtilaflar, maliyyə bazarlarında qeyri-sabitlik və Hörmüz boğazı üzərindən keçən gəmiçilik riskləri kimi iqtisadi faktorlar təsir edib.
Məqalə müəllifi ABŞ-ni hərbi cəhətdən zəif hesab etməyin yanlış olduğunu bildirir. Lakin əsas riskin ondan ibarət olduğu vurğulanır ki, rəqib dövlətlər bu prosesi Vaşinqtonun müttəfiqlərinin müdafiəsi üçün yüksək siyasi və iqtisadi bədəl ödəməyə əvvəlkindən daha az hazır olması kimi qiymətləndirə bilər.
22:23 27.06.2026
Oxunuş sayı: 54
