Azərbaycan iqtisadiyyatı genişlənir: Ciddi dividentlər ehtimal edilir
Azərbaycanın son illərdə həyata keçirdiyi iqtisadi strategiya təkcə daxili maliyyə sabitliyinin qorunması ilə deyil, eyni zamanda beynəlxalq maliyyə sistemində mövqeyinin gücləndirilməsi ilə də diqqət çəkir. Məhz bu kontekstdə ölkənin ötən il xarici maliyyə institutlarının səhm kapitalında iştirak üçün 6 milyon manat vəsait yönəltməsi maraq doğuran addımlardan biridir. Bu qərar Azərbaycanın beynəlxalq maliyyə proseslərində təsir imkanlarının artırılması, yeni investisiya alətlərinə çıxış əldə edilməsi və iqtisadi əməkdaşlığın genişləndirilməsi baxımından necə qiymətləndirilməlidir? Xarici maliyyə institutlarının səhm kapitalında iştirak ölkəyə hansı üstünlükləri qazandırır?
Mövzu ilə bağlı Liberal İqtisadçılar Birliyinin sədri Akif Nəsirli Crossmedia.az-a açıqlama verib: “Azərbaycanın xarici maliyyə institutlarının səhm kapitalında iştirak üçün 6 milyon manat vəsait ayırması ümumilikdə strateji və uzunmüddətli baxımdan müsbət qiymətləndirilə bilər. Bu cür iştirak ölkəyə yalnız maliyyə gəliri əldə etmək imkanı vermir, həm də beynəlxalq maliyyə sistemində mövqeyini gücləndirir. Xarici maliyyə institutlarının səhmdarı olmaq Azərbaycana həmin qurumların idarəetmə proseslərində müəyyən söz haqqı qazandırır. Bu isə regional və beynəlxalq maliyyə layihələrinin hazırlanması zamanı ölkənin maraqlarının nəzərə alınmasına kömək edə bilər. Belə iştirak beynəlxalq maliyyə təşkilatları ilə əməkdaşlığı dərinləşdirir, investisiya və kredit resurslarına çıxışı asanlaşdırır. Eyni zamanda Azərbaycan maliyyə sektorunun beynəlxalq təcrübədən faydalanmasına, yeni idarəetmə və risk qiymətləndirmə mexanizmlərini mənimsəməsinə şərait yaradır”.
İqtisadçı əlavə edib ki, maliyyə baxımından isə bu investisiyalar gələcəkdə dividend və ya kapital artımı şəklində gəlir gətirə bilər: “Lakin əsas məqsəd qısamüddətli qazanc deyil, ölkənin beynəlxalq maliyyə əlaqələrinin genişləndirilməsi və iqtisadi təsir imkanlarının artırılmasıdır. Bununla belə, bu cür yatırımların səmərəliliyi seçilən maliyyə institutlarının fəaliyyətindən, onların gəlirliliyindən və Azərbaycanın həmin qurumlardakı iştirak payının nə dərəcədə effektiv istifadə olunmasından asılıdır. Ona görə də belə investisiyaların nəticələri daha çox uzunmüddətli perspektivdə qiymətləndirilməlidir”.
Ayhan
12:10 10.06.2026
Oxunuş sayı: 65
