Gecə növbəsində çalışanların "yaralı yeri": Maaş məsələsi həllini tapır?
Azərbaycanda gecə növbəsində çalışan minlərlə işçi illərdir eyni problemdən şikayətlənir – qanunvericilik əlavə ödənişi nəzərdə tutsa da, bir çox hallarda gecə əməyinin qarşılığı əməkhaqqında əksini tapmır. Xüsusilə zavod, xəstəxana, təhlükəsizlik, xidmət və istehsalat sahələrində çalışanlar bildirirlər ki, gecə saatlarında işləmələrinə baxmayaraq maaşlarında ciddi fərq yoxdur. Halbuki, Azərbaycan Respublikasının Əmək Məcəlləsinin 166-cı maddəsi gecə vaxtı yerinə yetirilən işə görə əməkhaqqının artırılmış qaydada ödənilməsini tələb edir. Mövcud vəziyyət isə bu tələbin praktikada nə dərəcədə icra olunduğu sualını gündəmə gətirir.
Liberal İqtisadçılar Mərkəzinin sədri, iqtisadçı Akif Nəsirli mövzu ilə bağlı Crossmedia.az-a açıqlama verib: " Əmək Məcəlləsinin 166-cı maddəsi gecə növbəsində çalışan işçilərin əməyinin əlavə ödənişlə qiymətləndirilməsini nəzərdə tutur. Bu, sosial baxımdan mühüm məsələ hesab edilir. Son dövrlərdə yaşayış xərclərinin artması, inflyasiya və əmək bazarında müəyyən dəyişikliklər fonunda gecə növbəsi üzrə maaş əlavələrinin artırılması ilə bağlı gözləntilər mövcuddur. Xüsusilə səhiyyə, sənaye, nəqliyyat, təhlükəsizlik və xidmət sektorunda çalışanlar arasında bu məsələ daha çox müzakirə olunur. Belə bir artımın müsbət tərəfi odur ki, gecə işləməyin yaratdığı fiziki və psixoloji yük müəyyən qədər kompensasiya edilmiş olar. Bu həm işçilərin motivasiyasını artırar, həm də bəzi sahələrdə kadr çatışmazlığının qarşısını almağa kömək edə bilər".
İqtisadçı, həmçinin bildirib ki, əlavə ödənişlər insanların sosial rifahına və ailə büdcəsinə müsbət təsir göstərər: "Digər tərəfdən, maaş artımı işəgötürənlərin xərclərini yüksəldə bilər. Xüsusilə özəl sektorda bəzi müəssisələr əlavə maliyyə yükü səbəbindən işçi sayını azaltmağa və ya qiymət artımına getməyə məcbur qala bilər. Bu isə müəyyən sahələrdə xidmət və məhsul qiymətlərinə təsir göstərə bilər. Hazırda rəsmi şəkildə genişmiqyaslı artım qərarı açıqlanmasa da, sosial əmək münasibətlərində dəyişikliklərin davam etməsi gələcəkdə gecə növbəsi üzrə ödənişlərin yenidən nəzərdən keçirilməsi ehtimalını artırır".
Fatimə Məmmədova
18:01 29.05.2026
Oxunuş sayı: 64
