Çin liderinin Azərbaycan Prezidentinə məktubunda diqqətçəkən ifadə: Münasibətlərdə nə dəyişəcək?
Azərbaycanla Çin arasında münasibətlər son illər həm siyasi, həm də iqtisadi sahədə daha da genişlənməkdədir. Tərəflər arasında strateji əməkdaşlığın gücləndiyi bir dövrdə, ötən gün Çin Xalq Respublikasının Sədri Si Cinpin Azərbaycanın Müstəqillik Günü münasibətilə Prezident İlham Əliyevə təbrik məktubu göndərib. Çin lideri məktubunda iki ölkə arasında əlaqələrin inkişafından bəhs edərək, Azərbaycanla əməkdaşlığa böyük önəm verdiyini vurğulayıb. Si Cinpin həmçinin Çin-Azərbaycan münasibətlərinin yeni mərhələyə yüksəldiyini qeyd edib və əlaqələrin daha da gücləndirilməsi üçün birgə səylərə hazır olduğunu bildirib.
Politoloq Elxan Şahinoğlu ikitərəfli əlaqələrin perspektivi barədə Crossmedia.az-a danışıb: "Tərəflər arasında müttəfiqlik münasibətləri, iqtisadi əlaqələr və Orta Dəhliz layihəsi ilə bağlı əməkdaşlıq mövcuddur. ABŞ da Orta Dəhliz layihəsində maraqlıdır. Bu məsələ Qərbdə, Avropada və Amerikada böyük narazılıq doğurmaz. Azərbaycan və Rusiyanı Çinlə əsasən iqtisadi maraqlar birləşdirir. Avropa ölkələrinin özü də Çinlə iqtisadi əməkdaşlıq edir. ABŞ də Çinlə iqtisadi əlaqələr saxlayır. ABŞ Prezidenti Donald Trampın bu yaxınlarda Çinə səfəri olmuşdu. Bu da iqtisadi əlaqələrin yüksək səviyyədə olduğunu göstərir. Yəni Azərbaycan ABŞ ilə Çin arasında seçim etməyib”.
Politoloq Çin liderinin Azərbaycana göndərdiyi təbrik məktubunda yer alan “münasibətlər yeni səviyyəyə yüksəlib” ifadəsinə də toxunub. Onun sözlərinə görə, burada əsasən iqtisadi əlaqələr nəzərdə tutulur: “Çünki nəqliyyat yolları fəaliyyət göstərir, ticarət dövriyyəsi və iqtisadi əməkdaşlıq genişlənir. Məncə, Çin lideri də məhz bunu nəzərdə tutur. Pekinin Cənubi Qafqaz siyasətində Azərbaycana xüsusi yanaşmasının arxasında isə bir sıra maraqlar dayanır. Azərbaycan Cənubi Qafqazın əsas dövlətlərindən biridir. Ölkə həm iqtisadi, həm də hərbi gücünə görə regionda seçilir. Buna görə də Çin məhz Cənubi Qafqazın əsas dövləti ilə əlaqələrə xüsusi diqqət yetirir”.
Fatimə Məmmədova
18:57 26.05.2026
Oxunuş sayı: 46
