Azərbaycanla Türkiyə arasında təhsil sahəsində əməkdaşlığın inkişafına ehtiyac var - Politoloq
Türkiyə Respublikasının Prezidenti Rəcəb Tayyib Ərdoğandan 28 may - Müstəqillik Günü ilə bağlı Azərbaycan dövlət başçısı İlham Əliyevə təbrik məktubunda qeyd edib ki, Azərbaycanla bütün sahələrdə özünəməxsus sıx əməkdaşlığımızın inkişafına davam edəcəyik. Bu iki ölkə arasında mövcud strateji münasibətlərin gələcək perspektivlərini bir daha gündəmə gətirib. Azərbaycan və Türkiyə arasında artıq siyasi, iqtisadi, enerji, hərbi və humanitar sahələrdə geniş əməkdaşlıq platforması formalaşıb.
Bu fonda əsas sual ondan ibarətdir ki, mövcud əlaqələrin daha da dərinləşdirilməsi üçün hansı sahələr prioritet olmalıdır və hələ tam potensialını reallaşdırmamış istiqamətlər varmı? Xüsusilə yeni dövrdə elm, təhsil, texnologiya və rəqəmsal inkişaf sahələrində əməkdaşlığın daha da genişləndirilməsi iki ölkənin strateji tərəfdaşlığını yeni mərhələyə daşıya bilər.
Mövzu ilə bağlı politoloq Vaqif Hüseyn Crossmedia.az-a açıqlama verib: “Ümumiyyətlə, Türkiyə ilə bir çox sahələrdə əməkdaşlıq daha da genişləndirilməlidir. Xüsusilə təhsil sahəsində çox sıx əməkdaşlığa ehtiyac var. Əlbəttə ki, iqtisadi, ticarət və digər müxtəlif sahələrdə də müəyyən əlaqələr mövcuddur, lakin təhsil sahəsində əməkdaşlığın daha da dərinləşdirilməsi vacibdir. Məncə, Türkiyə universitetlərinin təcrübəsi Azərbaycanda daha geniş şəkildə paylaşılmalıdır. Eyni zamanda, böyük sayda türk universitetlərinin Azərbaycanda filiallarının açılması, ən azından təmsilçilik və ya bölmələrinin fəaliyyət göstərməsi məqsədəuyğun olardı. Burada təhsil alan tələbələrin diplomlarının Türkiyədə də rahat şəkildə tanınması üçün daha geniş imkanlar yaradılmalıdır. Bu istiqamətdə real və funksional mexanizmlərin formalaşdırılması mühüm əhəmiyyət daşıyır”.
Politoloq əlavə edib ki, bundan başqa, Türkiyə ilə münasibətlərimiz təkcə qohumluq və dostluq səviyyəsində deyil, həm də strateji müttəfiqlik çərçivəsində daha da gücləndirilməlidir: “esab eHdirəm ki, bu əməkdaşlıq hüquqi sənədlərlə daha da möhkəmləndirilməlidir. Çünki siyasi iqtidarlar dəyişə bilər, amma hüquqi sənədlərlə təsbit olunmuş strateji əməkdaşlıq uzunmüddətli sabitlik yaradır. Ona görə də Azərbaycan və Türkiyə arasında mövcud olan qardaşlıq münasibətləri bütün sahələrdə, xüsusilə də təhsil və elm istiqamətində daha sistemli şəkildə hüquqi sənədlərdə əksini tapmalı və uzunmüddətli strateji əməkdaşlıq daha da gücləndirilməlidir”.
Ayhan
19:56 25.05.2026
Oxunuş sayı: 74
