Gənclərimizin Özbəkistanda təhsil almağı tarixi bağları möhkənləndirir- Ekspert
"Özbəkistanla Azərbaycan arasında ən yüksək səviyyədə, ali siyasi rəhbərlik səviyyəsində dostluq və qardaşlıq münasibətləri var".
Bunu Azərbaycanın Gənc Alimi, Doktorant və Magistrlər Cəmiyyətinin sədri, Fəlsəfə doktoru İlqar Orucov Bakıda keçirilən Özbəkistan Universitetlərinin III Təhsil Sərgisində Crossmedia.az-a açıqlamasında deyib.
"Bugünkü tədbir dost, qardaş və bütün mənalarda Azərbaycanla çox geniş əlaqələrə malik olan, eyni zamanda Türk dövlətləri birliyində Azərbaycanla bərabər addımlayan Özbəkistan universitetlərinin sərgisidir. Hesab edirəm ki, elə bu da Azərbaycanda Türk dövlətlərinin universitetlərinə olan marağın göstəricisidir.
Bizi Türk dünyası ilə çox geniş mədəni və tarixi əlaqələr bağlayır. Düşünürəm ki, iki ölkə arasında təhsil əlaqələrinin genişləndirilməsi, elmi sahədə əməkdaşlığın genişləndirilməsi hər iki dövlət üçün maraqlı və faydalıdır.
Özbəkistanla Azərbaycan arasında tarixi bağlar var. Eyni zamanda iki xalqın mədəni əlaqələrinin, tarixi yaddaşdan gələn münasibətlərin təhsil sahəsində genişləndirilməsi önəmlidir. Hesab edirəm ki, Azərbaycan gəncləri üçün də son illərdə, xüsusilə Türk dövlətlərinin universitetləri kifayət qədər maraq kəsb edir.
Gənclərimizin Özbəkistanda təhsil alması, Özbəkistan gənclərinin Azərbaycanda təhsil alması dövlətlər arasında tarixi bağları daha da möhkəmləndirir, onları sarsılmaz edir. Təhsil əlaqələri eyni zamanda gələcəkdə iqtisadi əlaqələrin genişləndirilməsi, mədəni birliyin daha da möhkəmlənməsi deməkdir".
Müsahibimiz söyləyib ki, Özbəkistanla Azərbaycan arasında ən yüksək səviyyədə, ali siyasi rəhbərlik səviyyəsində dostluq və qardaşlıq münasibətləri var: "Bu münasibətlərin, təhsil əlaqələrinin dərinləşməsi və qarşılıqlı əməkdaşlığın genişlənməsi bütövlükdə əlaqələrin gələcəkdə daha da inkişafına gətirib çıxaracaq. Güclənən iqtisadi və siyasi əlaqələr üçün bu, bir baza olacaq.
Xüsusilə Azərbaycan və Türk dövlətləri arasında mədəni, elmi və təhsil əlaqələrinin genişləndirilməsi hər iki ölkə üçün, hər iki xalq üçün və bütövlükdə Türk dövlətlərinin birliyi üçün faydalıdır. Bugünkü hadisəni əlamətdar hesab edirəm və ümid edirəm ki, gələcəkdə bu əlaqələrimizin daha geniş üfüqlərdə inkişafını görə biləcəyik".
Mehriban Yariyeva
18:28 23.05.2026
Oxunuş sayı: 59
