Bakı beynəlxalq təhsil platformasına çevrilir - Özbəkistan universitetlərinin nümayəndələri artıq paytaxtdadır
Bakıda Özbəkistan Universitetlərinin III Təhsil Sərgisii ilə əlaqədar olaraq iştirak edəcək Özbəkistan Ali Təhsil müəssisələrinin nümayəndələri artıq Bakıdadır.
Crossmedia.az xəbər verir ki, “İngla International ETC”, Özbəkistan Ali Təhsil Nazirliyi, Özbəkistanın Azərbaycandakı səfirliyi və AMEA-nın Mərkəzi Elmi Kitabxanasının dəstəyi ilə təşkil olunacaq tədbirə gələn universitet nümayəndələri gecədən etibarən artıq Bakıdadır.
Sərgi çərçivəsində onların Azərbaycanın ali təhsil müəssisələrində görüşlər keçirməsi, ölkədəki təhsil və elmi mühitlə yaxından tanış olması nəzərdə tutulur. Tədbir Azərbaycan və Özbəkistan arasında təhsil sahəsində əməkdaşlığın genişlənməsi baxımından da mühüm platforma hesab olunur.
Sərgidə Özbəkistanın 20-yə yaxın dövlət və özəl universitetinin iştirakı gözlənilir. Ümumilikdə isə tədbirə 50-yə yaxın rəsmi nümayəndə qatılacaq. Hazırda qeydiyyat və müraciət prosesi davam edir.
Tədbirdə Azərbaycanın rəsmi şəxsləri, millət vəkilləri, elm və təhsil ictimaiyyətinin nümayəndələri, ictimai-siyasi xadimlər, QHT və media təmsilçiləri iştirak edəcəklər. Bununla yanaşı, sərgiyə iki mindən çox gəncin qatılacağı gözlənilir.
Özbəkistan Universitetlərinin III Təhsil Sərgisi mayın 23-də AMEA-nın Mərkəzi Elmi Kitabxanasında keçiriləcək.
Qeyd edək ki, Özbəkistan Universitetlərinin I Təhsil Sərgisi ötən il Bakıda təşkil olunmuşdu. II sərgi isə bu ilin yanvar ayında baş tutmuşdu.
Elmir Heydərli
13:25 22.05.2026
Oxunuş sayı: 61
