“Türkiyə üçün yeni fürsətlər yaranıb” – Ekspertdən AÇIQLAMA
Bəşər Əsədin devrilməsi Orta Şərqin mürəkkəb siyasi mənzərəsində yeni imkanların qapısını açıb. Türkiyə bu dəyişiklikdən istifadə edərək regional və qlobal səviyyədə öz mövqeyini möhkəmləndirməyə çalışır. Qaçqın böhranı və digər çətinliklərə baxmayaraq, yaranan yeni fürsətlər Türkiyənin siyasi və iqtisadi üfüqlərini genişləndirməkdədir.
Mövzu ilə bağlı siyasi şərhçi Kazım Kazımov Crossmedia.az-a verdiyi açıqlamada qeyd edib ki, Əsədin devrilməsi Türkiyədə daha çox imkanların yaranmasına şərait yaradıb:
“Əsədlə Türkiyə arasındakı münasibətlər uzun müddətdir düşmənçilik səviyyəsində idi. Suriya vətəndaş müharibəsindən ən çox təsirlənən ölkələrdən biri Türkiyə oldu. Milyonlarla suriyalı qaçqın Türkiyəyə sığındı ki, bu da ölkə üçün həm maliyyə yükü yaratdı, həm də təhlükəsizlik sahəsində ciddi problemlərə səbəb oldu. Bundan əlavə, Əsəd hökumətinin anti-Türkiyə mövqeyi Türkiyə üçün maneələr yaradırdı. Lakin onun devrilməsi yeni perspektivlər açıb.
Birincisi, Türkiyənin dəstəklədiyi müxalif qüvvələrin Suriya hökumətində təmsil olunması ehtimalı güclənib. İkincisi, bu dəyişiklik Suriya qaçqınlarının öz vətənlərinə geri göndərilməsi üçün imkan yaradır”.
Kazım Kazımov eyni zamanda Türkiyənin üzləşə biləcəyi çətinliklərdən də danışıb:
“Suriya məsələsində Türkiyə ilə İsrail arasında ciddi fikir ayrılıqları mövcuddur. Bundan əlavə, HTŞ qruplarının Türkiyə ilə münasibətləri kifayət qədər gərgindir. Müxaliflərin müəyyən hissəsi Türkiyəyə tam dəstək vermir ki, bu da gələcəkdə yeni problemlər yarada bilər.
Kürd kantonlarına gəlincə, Türkiyə bu məsələdə illərdir güzəştsiz mübarizə aparır. “Zeytun budağı” və “Barış pınarı’” əməliyyatları ilə Türkiyə PKK-nın Suriya qoluna ciddi zərbələr endirib. Hazırda həmin bölgələrdə Türk ordusunun nəzarəti möhkəmdir və Türkiyə Suriyada kürd kantonunun yaradılmasına heç bir halda icazə verməyəcək”.
Samirə Şərif
12:09 16.12.2024
Oxunuş sayı: 17884
