Yaxın Şərq

İran niyə açıq müharibəyə girmək istəmir? – politoloqdan şərh

Yaxın Şərqdə gərginliyin yenidən artdığı bir dövrdə İsrailin Baş naziri Benyamin Netanyahu İranla mümkün siyasi nizamlanma fonunda Livandakı “Hizbullah” hərəkatına qarşı əməliyyatların dayandırılmasının gündəmdə olmadığını bəyan edib.

Onun sözlərinə görə, İsrail regional təhlükəsizlik maraqlarını prioritet hesab edir və bu istiqamətdə geri addım atmaq niyyətində deyil.

“CBS News” telekanalına müsahibəsində Netanyahu həmçinin İranın zəifləməsinin və ya ölkədə mümkün hakimiyyət dəyişikliyinin Tehranın regiondakı müttəfiqlərinə də təsir göstərəcəyini bildirib. Baş nazirin fikrincə, bu proses “Hizbullah”, HƏMAS və Yəməndə fəaliyyət göstərən husi qüvvələrinin mövqelərinin zəifləməsinə səbəb ola bilər.

Məsələ ilə bağlı siyasi şərhçi İlqar Vəlizadə Crossmedia.az-la öz fikirlərini bölüşüb:

"Qısaca desək, İranla İsrail arasında yaranan qarşıdurma təkcə Hizbullah məsələsi ilə bağlı deyil. Vaxtilə Hizbullah ilə Israil arasında açıq müharibə baş vermişdi və həmin dövrdə Iran birbaşa iştirak etməmiş, əsasən dəstək verməklə kifayətlənmişdi.

Ehtimal olunur ki, hazırkı vəziyyətdə də oxşar yanaşma davam edə bilər. Çünki İran hazırda açıq şəkildə genişmiqyaslı müharibəyə qoşulacaq vəziyyətdə görünmür. Daha çox nisbi sakitlikdən istifadə edərək silahlanmasını və hərbi potensialını gücləndirməyə çalışır. Hesab edirəm ki, İran birbaşa müharibəyə daxil olmaqdan daha çox, dolayı dəstək vermək xəttini davam etdirəcək".

Elmir Heydərli

🖨 Çap et

12:50 12.05.2026

Oxunuş sayı: 62