Xarici xəbərlər

İran ABŞ ilə nüvə danışıqlarına hazırdır: 3 mərhələli plan açıqlanıb

İran ABŞ ilə nüvə məsələsini müzakirə etməyə hazır olduğunu bildirib.

Crossmedia.az xəbər verir ki, bu barədə məlumatı “Əl-Ərəbiyyə" mənbələrə istinadən yayıb.

Xəbərdə qeyd olunur ki, Tehran sülh danışıqları ilə bağlı bəzi tələblərində dəyişiklik edərək daha yumşaq mövqe nümayiş etdirib. İran uranın zənginləşdirilməsi səviyyəsini 3,5%-ə endirməyi və zənginləşdirilmiş material ehtiyatlarını tədricən azaltmağı təklif edir.

Məlumata əsasən, İran üç mərhələdən ibarət plan irəli sürüb. Birinci mərhələdə müharibənin dayandırılması və atəşkəsin daimi sülhə çevrilməsi (təxminən 30 gün ərzində), həmçinin Hörmüz boğazının açılması və ABŞ tərəfindən tətbiq edilən blokadanın tədricən aradan qaldırılması nəzərdə tutulur. Bu mərhələdə regionda, o cümlədən İsrail də daxil olmaqla, hərbi əməliyyatlara son qoyulması vurğulanır.

İkinci mərhələ orta müddətli dövrü əhatə edir və nüvə sazişinin əldə olunmasını nəzərdə tutur. Bu çərçivədə uranın zənginləşdirilməsinin 15 il müddətinə dondurulması, sonrakı mərhələdə isə yalnız mülki məqsədlərlə 3,5%-ə qədər məhdudlaşdırılması təklif edilir. Eyni zamanda nüvə obyektlərinin sökülməməsi və sanksiyaların mərhələli şəkildə ləğvi də planın əsas bəndləri sırasındadır.

Üçüncü, uzunmüddətli mərhələdə isə Yaxın Şərqdə təhlükəsizlik məsələləri üzrə geniş danışıqların başlanması nəzərdə tutulur.

🖨 Çap et

09:40 04.05.2026

Oxunuş sayı: 49