ABŞ-də Trampdan sonra da siyasi dəyişikliklər davam edə bilər
ABŞ-də Respublikaçılar Partiyasının ideologiyası ciddi dəyişikliklərə məruz qalır və bu prosesin Donald Trampın siyasi fəaliyyətindən sonra da davam edəcəyi gözlənilir.
Crossmedia.az xəbər verir ki, “The Political Quarterly” elmi jurnalı bu barədə araşdırma dərc edib.
Politoloqlar Edvard Eşbi və Aleks Vaddanın araşdırmasına görə, ABŞ-də mühafizəkar siyasət Ronald Reyqan dövründən bəri formalaşmış ənənəvi prinsiplərdən tədricən uzaqlaşır.
Tədqiqatçılar bildirirlər ki, Respublikaçılar Partiyasında azad bazar iqtisadiyyatı, dövlətin iqtisadiyyata minimum müdaxiləsi və ABŞ-nin qlobal təsirinin genişləndirilməsi kimi yanaşmalar əvvəlki əhəmiyyətini itirir.
Onların yerini iqtisadi millətçilik, yerli istehsalçıların gömrük tarifləri ilə qorunması, dövlət dəstəyi, iş yerlərinin xaricə köçürülməsinə qarşı mübarizə və ənənəvi dəyərlərin müdafiəsi tutur.
Dəyişikliklər xarici siyasətdə də müşahidə olunur. Respublikaçılar arasında demokratiyanın yayılması məqsədilə xaricdə hərbi müdaxilələrə üstünlük vermək əvəzinə, beynəlxalq öhdəliklərin azaldılması və ABŞ-nin milli maraqlarına, xüsusilə Çinlə rəqabətə diqqətin artırılması tərəfdarları çoxalır.
Araşdırmada vurğulanır ki, bu tendensiyalar Donald Trampın prezidentliyindən əvvəl başlayıb. Belə ki, 2014-cü ildə respublikaçıların təxminən 40%-i ABŞ-nin beynəlxalq məsələlərə müdaxiləsinin azaldılmasını dəstəkləyirdi. Bu göstərici 2006-cı illə müqayisədə təxminən iki dəfə yüksək idi.
Müəlliflər formalaşan ideoloji istiqaməti “yeni füzyonizm” adlandırırlar. Bu anlayış iqtisadi millətçilik, sosial mühafizəkarlıq və xarici siyasətdə praqmatik yanaşmanın birləşməsini ifadə edir.
Tədqiqatçıların qənaətinə görə, Donald Tramp bu siyasi dəyişikliklərin yaradıcısı deyil, onları təmsil edən əsas siyasi fiqurlardan biridir.
Müəlliflər hesab edirlər ki, yeni ideoloji istiqamət Respublikaçılar Partiyasında uzunmüddətli xarakter daşıyır və Trampın siyasi gələcəyindən asılı olmayaraq davam edə bilər.
10:46 11.11.2026
Oxunuş sayı: 43
