Qolan təpələri İsrail-Suriya münasibətlərində qaynar nöqtədir
İsrail Baş naziri Benyamin Netanyahu, Qolan təpələrinin əbədi olaraq İsrailin hakimiyyəti altında qalacağını vurğulayıb. Yaxın Şərqin mübahisəli bölgələrindən olan Qolan təpələri, İsrailin milli təhlükəsizliyi və su ehtiyatları baxımından strateji əhəmiyyət daşıyır. Beynəlxalq hüquqa görə Suriyanın ərazisi hesab edilən bu bölgə, 1967-ci ildə İsrail tərəfindən işğal edilmiş və 1981-ci ildə birtərəfli qaydada ilhaq olunmuşdur.
Mövzu ilə bağlı Crossmedia.az-a açıqlama verən “Atlas” Araşdırmalar Mərkəzinin rəhbəri, politoloq Elxan Şahinoğlu bildirib: “İsrail, Suriyada yaranan vəziyyətdən istifadə edərək öz mövqelərini gücləndirməyə çalışır. Baş nazir Netanyahu belə hesab edir ki, İsrail Hizbullah və İrana qarşı zərbələr endirməsə, Əsəd rejimi devrilməyəcək. İranın bölgədəki təsirini zəiflətmək, Əsəd rejiminin gücünə mənfi təsir göstərə bilər.”
Şahinoğlu əlavə edib ki, İsrail, Suriyanın bəzi bölgələrində mövqelərini daha da gücləndirmək niyyətindədir: “Baş nazirin ordusuna verdiyi əmrlər, hazırkı mövqelərin möhkəmləndirilməsi məqsədi daşıyır. Lakin bu vəziyyət bölgədə gərginliyi daha da artırmaq potensialına malikdir. İsrailin maraqları bölgədəki qeyri-sabitliyi daha da dərinləşdirə bilər.”
Politoloq, Suriyada qurulacaq yeni hökumətin İsrailin bu addımlarını qəbul etməyəcəyini də qeyd edib: “Suriyada formalaşacaq yeni hökumət ölkənin ərazi bütövlüyünü təmin etmək üçün çalışacaq və İsrailin bu mövqelərdə güclənməsinə qarşı çıxacaq. Buna görə də, İsrail beynəlxalq hüquqa əməl etməli və işğal etdiyi ərazilərdən geri çəkilməlidir. Əks halda, bölgədəki gərginlik artaraq daha genişmiqyaslı qarşıdurmalara səbəb ola bilər.”
Politoloq bu vəziyyətin Yaxın Şərqdə uzunmüddətli sabitliyə mane olacağını bildirib. Qolan təpələri üzərində davam edən münaqişə, bölgədəki gərginliyin əsas qaynaqlarından biri olaraq qalır.
Maral Şahverdili
12:38 10.12.2024
Oxunuş sayı: 19360
