Dünya məktəbində natiqlik və ünsiyyət forumu keçirildi
Bu gün Dünya məktəbində "GUYS GROUP" və ÜTÜ Qrup" tərəfindən "Mən danışa bilmirəm 2" adlı natiqlik və ünsiyyət forumu təşkil olundu. Tədbir, himnin səsləndirilməsi və şəhidlərimizin xatirəsinə bir dəqiqəlik sükutla başladı. Forumda məktəbin nümayəndələri, millət vəkilləri, könüllülər və media təmsilçiləri iştirak etdilər.
İlk olaraq forumun təşəbbüskarları, "ÜTÜ Qrup" MMC-nin təsisçisi Zaur Cahangirov və "GUYS" İctimai Birliyinin rəhbəri Mübariz Quliyev çıxış etdilər. Ardınca millət vəkili Ceyhun Məmmədov gənclərin nitq problemlərinin səbəbləri haqqında fikirlərini bölüşdü və siyasətçilərin jest-mimika dilindən necə istifadə etdiklərini nümunələrlə izah etdi. O, Ulu Öndər Heydər Əliyev və Barak Obama kimi liderlərin bu sahədəki bacarıqlarını vurğuladı.
Deputat Vüqar İskəndərov çıxışında nitqin əhəmiyyətini önə çəkərək, danışma qabiliyyətinin uğur üçün nə qədər vacib olduğunu, nitqdə çətinlik çəkən insanların potensiallarının tam olaraq üzə çıxmadığını qeyd etdi.
Tədbir zamanı bir sıra maraqlı təqdimatlar yer aldı. Diləzbər Hüseynova "Ebru necə danışır?" adlı təqdimatını təqdim etdi, Gültəkin Əliyeva isə "Nitqindən pul iyisi gəlir" mövzusunda fikirlərini bölüşdü. Əsmər Kərimbəyova "Görmürəm, eşitmirəm, elə bilirsən bilmirəm?" adlı təqdimatla iştirakçıları düşündürdü. Həmçinin, Zaur Cahangirov "Bir səhv idi çıxış edim" adlı təqdimatı ilə diqqət çəkdi. Digər iştirakçılar arasında Ülkər Çələbiyeva "Sözümüzlə necə sataq?", Şəlalə Mehdiyeva "Tələffüzüm yerlə gedir" və Günay İbadova "Həyəcan da gözəldir, səndən gözəl olmasın" adlı təqdimatlarla çıxış etdilər.
Forumda həmçinin fasilə zamanı iştirakçılar üçün kofe-breyk təşkil edildi. Kofe-breykin təşkilində Final çayları, Njoy Coffee, Mamam Chocolate & Bakery, Daşlı Bulaq brendləri xüsusi dəstək göstərdi.
Tədbirin sonunda iştirakçılara sertifikatlar təqdim olundu və tədbir xatirə fotosu ilə başa çatdı.
Aysel Ağakərimova
16:02 08.12.2024
Oxunuş sayı: 10315
