Balkarların qara martı: 81 İl sonra da unudulmayan faciə
Balkar xalqı üçün tarixdə silinməz bir iz buraxmış hadisənin- Balkarların 1944‑cü il deportasiyasından 81 il ötür.
Hər il mart ayının bu günləri Kabaradino‑Balkar Respublikasında və diasporada müxtəlif anma tədbirləri keçirilir. Qurbanların xatirəsi yad edilir və bu faciənin təfərrüatları yenidən təhlil olunur.
1944‑cü ildə Sovet Sosialist Respublikalarının rəhbərliyi Balkar xalqını, bütün etnik qrupunu “xalqın xəyanəti” və “nasistlərlə əməkdaşlıq” ittihamı ilə məhkəməsiz, sənədsiz və ancaq mənsubiyyətinə görə təqsirləndirdi.
Həqiqətdə isə Balkarlar SSRİ ordusunda döyüşən minlərlə əsgər vermiş, həm Vətən müharibəsində, həm də digər döyüş əməliyyatlarında Sovet ordusuna yardım etmişdilər.
İttihamlar əsassız olsa da, SSRİ rəhbərliyi 5 mart 1944‑cü il tarixli qərarla balkarların deportasiyasını təsdiqlədi. Əməliyyat 8 mart 1944‑cü il səhər saatlarında NKVD tərəfindən icra edildi.
Əməliyyat inanılmaz dərəcədə sürətlə təxminən iki saat ərzində həyata keçirildi. Ailələrə demək olar ki, heç nə demədən yalnız ən zəruri az əşya götürmək üçün qısa zaman verildi və evlərindən çıxarıldılar.
Bütün balkar əhalisi, o cümlədən uşaqlar, qadınlar, qocalar, hərbi veteranlar, xəstə və əlillər, heç bir fərq qoyulmadan yük vaqonlarına mindirildi.
37 713 nəfər balkar deportasiya edildi və onları 14 qatar ilə Qazaxıstan, Qırğızıstan və Sibirin müxtəlif bölgələrinə göndərdilər. Nəqliyyatın özü dəhşətli idi, vaqonlarda işıq və istilik yox idi, çürük və amansız şəraitdə insanlar çoxsaylı zorakılıq, aclıq və xəstəliklərlə qarşılaşdılar. Deportasiya səfəri təxminən 18 gün sürmüş və bu müddətdə ən azı 562 nəfər - rəsmi məlumatlara görə yol boyu həlak olmuşdur. Lakin unudulmamalıdır ki, deportasiyanın nəticələri yalnız qatar səyahəti ilə bitmədi.
Ekspertlərin və balkar mənbələrinin hesablamalarına görə, bu zorla köçürülmə və məcburi məskunlaşma nəticəsində ümumilikdə təxminən 7 600-11 000 balkar həyatını itirmiş və bu xalqın təxminən 20–25%-i məhv olmuşdur.
Yeni yerlərdə balkarların qarşılaşdığı çətinliklər dəhşətli idi: aclıq və ərzaq çatışmazlığı, dondurucu soyuq, sığınacaqsız şərait, uşaqların xəstəlik və zəiflikdən ölümü, köçkün ailələrin dağılması, fiziki əmək və qeyri‑insani şəraitdə yaşam məcburiyyəti...
Balkarların öz yurdlarına qayıtması yalnız 1957‑ci ildə, Sovet İttifaqının keçmiş lideri İosif Stalinin ölümündən sonra mümkün oldu. O vaxtdan sonra Kabardino‑Balkar Muxtar Sovet Sosialist Respublikası yenidən bərpa edildi və köçkünlər vətənlərinə dönə bildilər.
Lakin bu qayıdış asan olmadı: bir çoxları evlərini talan olunmuş və xarab vəziyyətdə tapdı, ölkə daxilində sosial və mədəni yenidənqurma illərlə davam etdi. Bu gün də 28 mart balkarlar tərəfindən “Balkar xalqının yenidən bərpası” günü kimi qeyd olunur. Bu tarix balkarları vətənə dönüşün rəsmi tanındığı gündür.
Balkar deportasiyası tək bir xalqın faciəsi deyil. Sovet dövründə etnik təmizləmə və zorla köçürmə siyasətinin bir hissəsi idi. 1930‑cu illərdən 1950‑ci illərə qədər SSRİ rəhbərliyi bir neçə etnik qrupları- çeçen‑inguşlar, karaçaylar, krım tatarları, ahıska türkləri və digər xalqları da daxil olmaqla zorla köçürmüş, milyonlarla insanın həyatını alt‑üst etmiş, mədəni itkilər və sosial travmalar yaratmışdır.
Balkarlar üçün bu tarix sadəcə bir ildönüm deyil. Bu, insanlıq, hüquq və ədalət uğrunda davam edən xatirədir. Gənc nəsillər üçün milli yaddaşın unudulmaması və gələcəyə sülh, hörmət və bərabərlik naminə ötürülməsi mesajıdır.
Fatimə
15:59 11.03.2026
Oxunuş sayı: 3810
