Çarpaz baxış,Mədəniyyət
Səhnəmizin dəyişməz imzası – Hicran Nəsirova
Azərbaycan teatr və kino sənətinin özünəməxsus dəst-xətti ilə seçilən, hər bir obrazına ruhunun bir parçasını qatan dəyərli sənətkarımız, Əməkdar artist Hicran Nəsirova bu gün öz doğum gününü qeyd edir. O, səhnədə canlandırdığı hər bir obraz ilə tamaşaçının yaddaşında dərin iz buraxmağı bacaran, sənətin estetik tərəfi ilə bərabər, onun fəlsəfi dərinliyini də ustadlıqla təqdim edən bir simadır.
Hicran Nəsirovanın yaradıcılıq yolu Azərbaycan teatr tarixinin canlı vərəqləridir. Uzun illər səhnəmizdə yaratdığı rəngarəng obrazlar qalereyası onun sənətə olan sonsuz sadiqliyinin bariz nümunəsidir. Hicran Nəsirova üçün sənət sadəcə texnika deyil, həm də mənəvi bir missiyadır.
- Canlandırdığınız obrazlar arasında eləsi varmı ki, illər keçsə də hələ də sizin daxilinizdə yaşayır?
- Bütün obrazlar. Yazıçı yazır, aktyor isə yaşayır və yaradır. Obrazlara nəfəs verir, can verir. Buna görə də onların hər biri aktyorun daxilində yaşayır.
- Bu illər ərzində enerjinizin tükəndiyini hiss etdiyiniz anlarda sizi yenidən "ayağa qaldıran" və motivasiya verən əsas qüvvə nədir?
- Sənət sevgisi.
- Sənət fədakarlıq tələb edir. Bu illər ərzində sənətə görə nələri qurban verməli olmusunuz və buna dəyərdimi?
- Heç nəyə peşman deyiləm. Çünki bu mənim yazım, taleyimdir.
- Sizi formalaşdıran böyük sənətkarlardan aldığınız ən vacib nəsihət nə idi?
- Böyük sənətkarlardan sənətə vurğunluq, sadəlik, işgüzarlıq və daim axtarışda olmaq kimi dəyərləri öyrəndim.
- Sizcə, bir aktyor üçün "mənfi" xarakteri sevdirmək daha böyük uğurdur, yoxsa "müsbət" qəhrəmanı canlandırmaq?
- Hər bir obraz bir insan xarakteri, bir insan taleyidir. Nə müsbət, nə mənfi – əsas odur ki, onu professional şəkildə çatdıra biləsən.
- Bugünkü tələbələrin səhnəyə gətirdiyi “yeni nəfəs” sizi daha çox ümidləndirir, yoxsa klassik məktəbin itirilməsi qorxusu yaradır?
- İstedadlı gənclər çoxdur, ümid edirəm hər şey yaxşı olacaq. Müasirlik ayrı, klassika ayrı – biz klassika ilə yetişirik.
- Əgər bu gün sehrli bir qüvvə sizə keçmişdə oynadığınız bir rolu yenidən, lakin bugünkü təcrübənizlə oynamaq şansı versəydi, hansı obrazı seçərdiniz?
- Hələ oynamağa fürsət tapmadığım obrazları seçərdim.
Hicran xanım Azərbaycan teatr məkanında özünəməxsus plastikası, səs tembri və daxili dramatizmi ilə fərqli məktəb yaradan sənətkarlarımızdan biridir. Onun yaradıcılığı və səhnə fəlsəfəsi gələcək nəsil aktyorlar üçün örnək olmaqla yanaşı, sənətə olan ehtiramı və sədaqəti ilə hər zaman yadda qalacaq. Bu gün onun doğum günündə biz onu həm peşəkar sənətkar, həm də teatrın canlı irsi kimi təbrik edirik.
12:31 11.03.2026
Oxunuş sayı: 237
