Yaxın Şərq
İranda ali rəhbərlik üçün yeni namizəd kim ola bilər?
Donald Trampın dünənki və bu günkü bəyanatlarına baxdıqda müəyyən fərqlər görürük. Dünən o bildirirdi ki, İranda rəhbərliyə onun 3 namizədi var. Ardınca isə qeyd etdi ki, Ali dini lider postuna namizədlərin hamısı öldürülüb. Bu baxımdan konkret bir ad üzərində dayanmaq kifayət qədər çətindir. Hələ savaş başlamamışdan əvvəl İran mediasında da Xameneinin 3 potensial varisinin olduğu, onların isə məxfi saxlanıldığı bildirilirdi. Həmin namizədlərdən birinin şura tərəfindən seçilə biləcəyi deyilirdi. O zamana qədər bu vəzifə Ərafiyə həvalə olunub. Lakin indiki vəziyyətdə bu posta namizəd olacaq şəxsin həm yüksək ruhani rütbəsi, həm də dövlət idarəçiliyi və siyasi təcrübəsi olmalıdır.
Bu sözləri Crossmedia.az-a açıqlamasında politoloq Oqtay Qasımov İrana rəhbərlik edə biləcək seçimlər barədə danışarkən deyib.
Politoloq bildirib ki, ABŞ prezidenti Venesuela variantının tətbiqində maraqlı ola bilər:
“Məsələn, Venesuelada Maduro hakimiyyətində ikinci vəzifəni tutan şəxs hazırda ölkə rəhbəridir və ABŞ-la əməkdaşlığa başlayıb. İranda da müxtəlif ssenarilər mümkündür. Hakimiyyət daxilində daha mötədil mövqeyə malik şəxslərlə müəyyən danışıqlar aparıla bilər. Digər arzuolunmaz variant isə ölkəyə kənardan hansısa qüvvələrin gətirilməsi praktikasıdır. Hərçənd bu ehtimal yüksək deyil. Şahın oğlu aktiv fəaliyyət göstərir və keçid hökumətinin qurulduğu ilə bağlı bəyanatlar səslənir. Amma İran kimi 90 milyondan çox əhalisi olan mürəkkəb ölkədə kənardan gətirilən və daxildə ictimai dayağı olmayan qüvvələrlə idarəçilik çətin olar.
Ən real ehtimal ölkə daxilində siyasi elita içərisində nüfuzu olan və Qərblə, xüsusilə ABŞ-la münasibətləri normallaşdırmağa maraqlı qüvvələrlə əməkdaşlıq və ya danışıqların aparılmasıdır.Bu baxımdan konkret ad çəkmək imkansızdır”.
Nihat Tahirov
11:15 03.03.2026
Oxunuş sayı: 1539
