Hadisə

Deputat köməkçisi olmaq istəyərkən pulundan oldu

Özünü hüquq-mühafizə orqanlarından birinin yüksək vəzifəli əməkdaşı kimi təqdim etməklə dələduzluq cinayəti törətməkdə təqsirləndirilən şəxsə hökm oxunub.

Crossmedia.az xəbər verir ki, Balakən Rayon Məhkəməsində Cinayət Məcəlləsinin 178.2.2, 178.2.3 və 178.2.4-cü maddələri ilə mühakimə olunan N.Xəlilov 4 il 2 ay 28 gün müddətinə azadlıqdan məhrumetmə cəzasına məhkum edilib.

İş materiallarından məlum olur ki, N.Xəlilov zərərçəkmişlərdən birinə onu deputat köməkçisi vəzifəsinə düzəldəcəyini vəd edib. Bunun müqabilində ondan 25 000 manat alıb.

N.Xəlilov başqa bir zərərçəkmişi isə hüquq-mühafizə orqanlarına işə düzəldəcəyi vədi ilə aldadıb. O bu yolla həmin zərərçəkmişin 11 800 manat pulunu ələ keçirib.

Üçüncü zərərçəkmiş isə ona borclu olan şəxslərdən pulunu ala bilmirmiş. N.Xəlilov bu məsələni həll edəcəyini deyib və bunun müqabilində həmin şəxsdən 8700 manat pul alıb. (Qaynarinfo)

🖨 Çap et

16:54 13.02.2026

Oxunuş sayı: 834