BMT xəbərdarlıq etdi: Suriyada vəziyyət təhlükəli mərhələyə qədəm qoyub
BMT-nin Suriya üzrə xüsusi nümayəndəsi Geir Pedersen xəbərdarlıq edib ki, Suriyada silahlı qruplaşmaların rejim qüvvələrinə qarşı ərazi iddialarını davam etdirməsi nəticəsində ölkə son dərəcə təhlükəli bir mərhələyə daxil olub.
Bu barədə Crossmedia.az Anadolu Agentliyinə istinadən xəbər verir.
Pedersen Təhlükəsizlik Şurasında çıxışı zamanı bildirib ki, silahlı qruplar şimal-qərbdə irəliləyərək Hələbin əsas regional mərkəzini ələ keçirmək və daha sonra Həmaya doğru hərəkət etmək məqsədi güdürlər. Onların nəzarət etməyə çalışdığı ərazilərdə təxminən 7 milyon insan yaşayır.
Suriya hökumət qüvvələri Həmada bəzi döyüşçüləri geri çəkilməyə məcbur edərək müdafiə xətləri qurublar. Lakin Pedersen qeyd edib ki, bu müdafiə xətləri hazırda ciddi sınaqdan keçirilir. HTS və digər silahlı qruplar Həmaya doğru irəliləyərək bu əhəmiyyətli şəhərə daha da yaxınlaşıblar. Bu şəhərdə təxminən 1 milyon insan yaşayır.
O, burada “Əl-Qaidə”nin Suriya qolu kimi tanınan, lakin 2017-ci ildə ondan ayrılan və BMT tərəfindən terror təşkilatı kimi tanınan “Həyat Təhrir əl-Şam” (HTS) qruplaşmasını nəzərdə tutub.
Pedersen əlavə edib ki, hökumətyönlü hava hücumları son günlərdə həm mülki, həm də hərbi hədəfləri vuraraq ciddi itkilərə səbəb olub. HTS və digər silahlı qruplar isə raket və dron hücumları təşkil edərək mülki itkilərə yol açıb, xüsusilə Həma və Hələb bölgələrində vəziyyət daha da ağırlaşıb.
O bildirib ki, tərəflər beynəlxalq hüquqa uyğun olaraq mülki əhalini və mülki infrastrukturu qorumalı, zorakılıqdan qaçan insanların təhlükəsiz keçidini təmin etməlidir. Ancaq bu tədbirlər kifayət deyil. Əlavə hərbi eskalasiya həm genişmiqyaslı yerdəyişmə, həm də daha çox mülki itkilər riski yaradır.
Pedersen vurğulayıb ki, gərginliyin azaldılması ilə yanaşı, Suriya xalqına aydın və etibarlı siyasi üfüqlər təqdim olunmalıdır.
Noyabrın 27-də Hələbin qərbində Əsəd rejimi qüvvələri ilə rejimə qarşı silahlı qruplar arasında baş verən toqquşmalar 14 ildir davam edən münaqişədə nisbətən sakit bir dövrdən sonra döyüşlərin yenidən şiddətlənməsinə səbəb olub.
Rusiya bu hücumların nəticəsində ən azı 30 mülki şəxsin həlak olduğunu bildirib. Rusiyanın BMT-dəki nümayəndəsi Vasili Nebenzya Təhlükəsizlik Şurasında çıxış edərək HTS terrorçularını və onların Suriyadakı vəziyyəti daha da sabitsizləşdirən koordinasiyalı hücumlarını qətiyyətlə pislədiklərini vurğulayıb. O əlavə edib ki, terrorçulara xarici dəstək göstərilir və bu dəstəkdə amerikalıların və onların müttəfiqlərinin rolu olduğu barədə məlumatlar var.
ABŞ nümayəndəsi Robert Vud isə bu iddiaları təkzib edib. O, Vaşinqtonun rejimə qarşı həyata keçirilən hücumlarla heç bir əlaqəsi olmadığını bəyan edib və bütün tərəfləri amansız hava hücumlarını dayandırmağa, beynəlxalq hüquqa riayət etməyə çağırıb.
Vud əlavə edib ki, rejim kimyəvi silahdan istifadəyə görə məsuliyyətə cəlb olunmalı və bu məsələdə Şura qətiyyətini nümayiş etdirməlidir. ABŞ İŞİD-in yenidən dirçəlməsinə imkan verməmək və Suriyanın şimal-şərqindəki ABŞ hərbi mövqelərini qorumaq üçün lazımi tədbirləri görməyə davam edəcək.
Gülay Qəribova
06:59 04.12.2024
Oxunuş sayı: 16696
