Türkiyə öz maraqları üçün ciddi addımlar atmalıdır - AÇIQLAMA
Suriya prezidenti Bəşər Əsəd İraqdan Türkiyə ilə danışıqlarda vasitəçilik etməsini istəyib. Lakin Bağdad buna cavab verməyib. Həmçinin Bəşər Əsədin Türkiyə tərəfi ilə danışıqlar aparmaq üçün Antalyaya təhlükəsizlik heyəti göndərdiyi bildirilir. Bəs İraqın potensial vasitəçi kimi çıxış etməsi, Türkiyə-Suriya münasibətlərinə hansı təsirləri göstərə bilər?
Məsələ ilə bağlı siyasi şərhçi Əziz Əlibəyli Crossmedia.az-a açıqlamasında bildirib ki, Bağdadın vasitəçilk etməsi hələ bəlli deyil:
"Ümumiyyətlə eyni proses Bağdadı da gözləyir. Bağdad dediyimizdə konkret olaraq hibridləşmiş hakimiyyətdən söhbət gedir, yəni Baş nazir, parlament və prezident sünni, şiə, kürd etnik qrupları tərəfindən bölüşdürülüb. Bu mənada İraq ölkədəki sünni və şiə probleminə həm kürd gözü, həm də şiə gözü ilə baxır. Bunun haqqında dəqiq fikir söyləmək çətindir. İraq özü faktiki olaraq 3 hissədən ibarətdir. Türkiyə isə öz maraqları üçün daha ciddi addımlar atmalıdır, çünki İraqa və Suriyaya baxdıqda onun indiki mövqeləri daha güclüdür".
Həmçinin Ə.Əlibəyli qeyd edib ki, bu proksi savaşların bəlli bir nöqtəsində azad Suriya ordusu kifayət qədər böyük güc təşkil edir:
"Diqqətlə baxsaq görərik ki, bölgədəki türkmənlər Türkiyənin dəstəyilə ciddi addımlar atırlar və bu mənada proseslər gedir. Hələb onun müsbət bir dinamikasını göstərir, amma qarşıdakı prosesi növbəti mərhələyə daşıyacaq digər oyunçuların varlığıdır. Hələ ki İranın və Rusiyanın mövqeyi özünü həlledici səviyyədə göstərmir. Birləşmiş Ştatların seçkiyə başı qarışıb və Hizbullah burada üstün mövqeyə sahib deyil. Eyni zamanda İraqdan gələn şiə qruplaşması Həşdi Şabinin prosesə təsir göstərmək üçün nə dərəcədə ciddi resurslara malik olacağı bilinmir. Ona görə də bir müddət gözləməliyik".
Gülşad İbrahimova
14:45 03.12.2024
Oxunuş sayı: 7977
